ევროკომისიამ Facebook €110 მილიონით ($122 მილიონი) დააჯარიმა, რისი მიზეზიც Whatsapp-ის შესყიდვის დროს, სხვადასხვა ევროპული სტრუქტურებისთვის არასწორი ინფორმაციის მიწოდება გახდა.

როგორც კომისიის მიერ გავრცელებულ პრეს-რელიზშია ნათქვამი, 2014 წელს, ფეისბუქმა უარყო, რომ Whatsapp-ისა და სოციალური ქსელის ანგარიშები ერთმანეთს ავტომატურად დაუკავშირდებოდა და მათ შორის მომხმარებლების ინფორმაციის მიმოცვლა განხორციელდებოდა.

"ამის ტექნიკური შესაძლებლობა უკვე 2014 წელსვე არსებობდა და ამის შესახებ ფეისბუქშიც იცოდნენ, მაგრამ კომპანიამ ეს ინფორმაცია დამალა", ნათქვამია კომისიის განცხადებაში.

2016 წლის სექტემბერში გერმანიამ ფეისბუქს მომხმარებლის ინფორმაციის შეგროვების შეწყვეტა დაავალა, იმავე ტიპის ბრძანება გამოიცა გაერთიანებულ სამეფოში, ხოლო იტალიამ კომპანია €3 მილიონით დააჯარიმა, რადგან მომხმარებლები, რომლებსაც Whatsapp-ის ცალ-ცალკე გამოყენება სურდათ, იძულებულნი იყვნენ თავიანთი ინფორმაცია, მაგალითად, ტელეფონის ნომერი, ფეისბუქისთვისაც გაეზიარებინათ. ამ საკითხზე გამოძიება ევროკომისიამ 2016 წლის დეკემბერში დაიწყო.

Facebook-ის მიერ გავრცელებულ პრეს-რელიზში ნათქვამია, 2014 წელს, კომისიისთვის მიწოდებულ ინფორმაციაში უნებური შეცდომა გაიპარა.