პროკურატურის განცხადებით, თანამშრომლობენ საქართველოში აშშ-ის საელჩოსთან მათ ტერიტორიაზე მომხდარი ფაქტის გამოძიების პროცესში.

რატომ არის მნიშვნელოვანი: TV პირველის დამფუძნებელს დეპუტატი ანრი ოხანაშვილი თავს დაესხა.

  • შემთხვევა აშშ-ს საელჩოში, ამერიკის დამოუკიდებლობის დღისადმი მიძღვნილ ღონისძიებაზე მოხდა.
  • როგორც წერეთელი ამბობდა, ოხანაშვილის გარდა სხვა დეპუტატებიც დაესხნენ თავს — ამას ქართული ოცნება უარყოფს.

დეტალები: აშშ-ის საელჩომ 15 ივლისს პროკურატურას მომხდართან დაკავშირებით გაუგზავნა ნოტა, რის საფუძველზეც პროკურატურამ სისხლის სამართლის საქმეზე დაიწყო გამოძიება.

  • უწყებას მიმართა ვატო წერეთელმა, რომელიც მიუთითებდა საქართველოს პარლამენტის წევრების მიერ მის მიმართ ჩადენილ ძალადობაზე.
  • პროკურატურას მიმართა დეპუტატმა, ანრი ოხანაშვილმაც, რომელიც მიუთითებს ვახტანგ წერეთლის მიერ მის მიმართ განხორციელებულ სავარაუდო მუქარაზე.
  • საქმეზე ასევე შესულია დეპუტატ ლევან მგალობლიშვილის შეტყობინებაც, რომელშიც მის მიმართ მომხდარ სავარაუდო ძალადობაზე მიუთითებდა.

გამოძიება სისხლის სამართლის კოდექსის ორი, 126-ე და 151-ე მუხლებითაა დაწყებული.

  • 126-ე მუხლი ძალადობას გულისხმობს.
  • 151-ე კი არის სიცოცხლის მოსპობის ან ჯანმრთელობის დაზიანების ანდა ქონების განადგურების მუქარა, როდესაც იმას, ვისაც ემუქრებიან, გაუჩნდა მუქარის განხორციელების საფუძვლიანი შიში.

არქივიდან: ინციდენტის შემდეგ, ოხანაშვილმა და თანაგუნდელებმა ძალადობრივი ქმედების გამართლება სცადეს.

  • მესიჯბოქი, ძირითადად, საერთო იყო — ისინი ცდილობენ დაამტკიცონ, თითქოს, როცა საქმე "კაცის ღირსებას" ეხება, მსგავსი საქციელი მისაღებია.