საუბარია ე.წ სუს-ის ჩანაწერებზე, დაახლოებით 58 000-მდე ფაილზე, სადაც აღწერილია ჟურნალისტების, რელიგიურ ორგანიზაციათა წარმომადგენლების, პოლიტიკოსების, სამოქალაქო აქტივისტების, დიპლომატებისა და სხვა პირთა კერძო კომუნიკაცია.

რატომ არის მნიშვნელოვანი: გავრცელებულ ფაილებში არსებული ინფორმაციის ავთენტურობა სხვადასხვა ადამიანმა უკვე დაადასტურა.

  • NGO-ების განცხადებით, თბილისის პროკურატურას არ მიუნიჭებია დაზარალებულის სტატუსი, მათვის, ვისაც უსმენენ.
  • "გენერალური პროკურატურა, მიუხედავად არასამთავრობო ორგანიზაციების მიერ 2022 წლის 18 მაისს გავრცელებული ერთობლივი მიმართვისა, ამ დრომდე უმოქმედოა".

საიას თქმით, საქმის მთავარი მიზანი საქართველოში ფარული მოსმენა-მიყურადების კანონმდებლობის კონვენციურ სტანდარტთან შეუსაბამობის გასაჩივრებაა.

  • აღნიშნულია, რომ 2021 წლის პირველ აგვისტოსა და 13 სექტემბრის ფაქტებზე არაეფექტიანი გამოძიება ამ კანონმდებლობისა და პრაქტიკის კიდევ ერთი უარყოფითი მაგალითია.

სამართლებრივი დეტალები: დავის საგანს ევროპული კონვენციის მე-8 მუხლის (პირადი და ოჯახური ცხოვრების დაცულობის უფლება) და მე-13 მუხლის (სამართლებრივი დაცვის ქმედითი საშაულების უფლება) დარღვევა წარმოადგენს.

  • საჩივრებში მოთხოვნილია, რომ წინამდებარე საქმეს ე.წ. ზეგავლენის მქონე საქმის სტატუსი (‘IMPACT CASE’) მიენიჭოს, ხოლო, სასამართლომ დაავალდებულოს სახელმწიფო, სრულად და ჯეროვნად წარუდგინოს საგამოძიებო მასალები.

აქამდე, ევროპარლამენტმა რეზოლუციით საქართველოს ხელისუფლებას მოუწოდა ეფექტურად გამოიძიოს ფარული მოსმენების სკანდალი და ჩამოაყალიბოს ადეკვატური მექანიზმები სახელმწიფო ინსტიტუტების მიერ თვალთვალისა და მონაცემთა შეგროვების დემოკრატიული კონტროლისთვის.

არქივიდან: 13 სექტემბერს ცნობილი გახდა, რომ ერთ-ერთი ღია წყაროზე, სავარაუდოდ, სუს-ის მოსმენების ამსახველი ფაილები აიტვირთა. ე.წ კრესებში იყო ელჩებზე, აქტივისტებზე, ჟურნალისტებსა და სასულიერო პირებზე მიყურადების ამხსახველი ჩანაწერები.

  • ატვირთული იყო Word-ის ასობით ფაილი, სადაც ჩანდა, რომ, სავარაუდოდ, სახელმწიფო სამსახურები სწავლობდნენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც.
  • პირველ აგვისტოს კი მთავარი არხის დირექტორმა ნიკა გვარამიამ თავის გადაცემაში განაცხადა, რომ სახელმწიფო უსაფრთხოების სამსახურის დოკუმენტები მოიპოვა, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული.