არასამთავრობო ორგანიზაციები განმარტავენ, რომ პრეზიდენტისგან საკონსტიტუციო სასამართლოს შესახებ კანონში ცვლილებებთან დაკავშირებით უფრო კრიტიკულ შეფასებებს ელოდნენ. NGO-ების განცხადებით, ორივე შემთხვევაში, დაძლევს თუ არ დაძლევს პარლამენტი პრეზიდენტის ვეტოს, ისინი აღნიშნული კანონის საკონსტიტუციო სასამართლოში გასაჩივრებას გეგმავენ.

ისინი ამბობენ, რომ პრეზიდენტის მიერ პარლამენტში გადაგზავნილი შენიშვნები სრულად არ ასახავს ვენეციის კომისიის დასკვნაში ასახულ პრობლემებს, რომელთაგან ერთ-ერთი უმნიშვნელოვანესი მაღალი კვორუმის პრობლემაა.

TI-ის იურისტი, გიორგი ბერაია განმარტავს, რომ ვეტოში არ არის სრულად ასახული ის შენიშვნები, რომლებიც სამოქალაქო სექტორსა და ვენეციის კომისიას ჰქონდა აღნიშნულ კანონპროექტთან დაკავშირებით. მისი თქმით, მიუხედავად იმისა, რომ რიგი საკითხები პრეზიდენტის ვეტოში უკეთესობისკენაა შეცვლილი, მაინც არ არის ყველა პრობლემა ამოწურული, რომელიც NGO-ებს აღნიშნულ კანონპროექტთან დაკავშირებით ჰქონდათ:

"შესაბამისად, ამ ვეტოს დაძლევის ან მიღების შემთხვევაში, ჩვენ მაინც განვიხილავთ საკონსტიტუციო სასამართლოსადმი მიმართვის გზას".

ფონდი ღია საზოგადოება - საქართველოს წამომადგენელი, გიორგი გუჯაბიძე კი ამბობს, რომ პრეზიდენტის შენიშვნებს 3 ძალიან მნიშვნელოვანი ხარვეზი აქვს:

"პირველი რიგში, ორგანული კანონი რომ გასაჩივრდეს, ამისთვის კვლავ მაღალი კვორუმი იქნება დადგენილი და ორგანული კანონით არის დარეგულირებული ძალიან დიდი სპექტრი საკითხებისა საქართველოს კანონმდებლობის მიხედვით. ასე, რომ ეს საკითხი ძალიან დიდი პრობლემა იქნება მაინც და ყველა შემთხვევაში გასაჩივრება იქნება საჭირო".

საკონსტიტუციო სასამართლოს შესახებ კანონში შეტანილ ცვლილებებს პრეზიდენტმა ვეტო გუშინ, 31 მაისს, დაადო.