პაკისტანი ეკონომიკურ კრიზისთან ბრძოლას სხვადასხვა მეთოდით ცდილობს, მათ შორის ერთ-ერთი კი მოწოდებაა იმის შესახებ, რომ ქვეყნის მოქალაქეებმა ნაკლები ჩაი დალიონ. მთავრობის თქმით, დღეში ნაკლები ჩაის მიღება იმპორტის მაღალ გადასახადებს ცოტათი შეამცირებს, რაც ეკონომიკური კრიზისის აღმოსაფხვრელად ერთ-ერთი მნიშვნელოვანი ნაბიჯია.

პაკისტანი ჩაის უმსხვილესი იმპორტიორია მსოფლიოში, რომელმაც მხოლოდ გასულ წელს 600 მილიონ დოლარზე მეტი ღირებულების ჩაის შეისყიდა, მაგრამ ახლა ქვეყანა ეკონომიკურ კრიზისს ებრძვის. "მივმართავ ერს, რომ შეამცირონ ჩაის მოხმარება და დღეში მხოლოდ 1-2 ფინჯანი დალიონ, რადგან ჩაი უკვე სესხის მეშვეობით შემოგვაქვს", — აცხადებს პაკისტანის მთავრობა.

ჩაის მოხმარების შემცირების მთავარი მიზეზი ის არის, რომ პაკისტანის უცხოური სავალუტო რეზერვები ბოლო პერიოდის განმავლობაში სწრაფად ეცემა. პაკისტანის სავალუტო რეზერვები თებერვალში 16 მილიარდი დოლარი იყო, რაც ივნისში 10 მილიარდ დოლარამდე დაეცა. ეს თანხა კი მხოლოდ ორი თვის იმპორტის ღირებულების დასაფარად აღმოჩნდა საკმარისი.

მთავრობის მიერ ჩაის მოხმარების შემცირების მოთხოვნა სოციალურ მედიაში განხილვის თემად იქცა. ბევრ პაკისტანელს კი ეჭვი ეპარება, რომ ქვეყნის ეკონომიკური კრიზისი დღეში ნაკლები ფინჯანი ჩაის დალევით გადაიჭრება.

პაკისტანის მთავრობა ჩაის იმპორტის შემცირების გარდა სხვა გზებითაც ცდილობს ქვეყნის ბიუჯეტის ხარჯების დაზოგვას. გასულ თვეში მთავრობამ საბაზრო ჯიხურებს სამუშაო დღის დასრულება საღამოს 9-ის ნახევრისთვის მოსთხოვა, რათა ელექტროენერგია დაიზოგოს. ასევე მთავრობამ სხვადასხვა ფუფუნების ნივთის იმპორტზე უარი განაცხადა, რათა ქვეყნის ბიუჯეტის ხარჯები შემცირდეს.