"მიკვირს, რამდენი მეურვე გამოუჩნდა უკრაინის პრეზიდენტს", — ასე დაიწყო პარლამენტის თავმჯდომარემ, შალვა პაპუაშვილმა პასუხი უკრაინის პრეზიდენტის პარლამენტში ჩართვასთან დაკავშირებით დასმული კითხვაზე. მას ამის შესახებ კითხვა რამდენიმე დეპუტატმა დაუსვა.

პაპუაშვილმა თქვა ისიც, რომ საქართველო არის ერთადერთი ქვეყანა ევროპაში, საიდანაც უკრაინას გაწვეული ჰყავს ელჩი. მან აღნიშნა, რომ ესაა სამწუხარო რეალობა, მიუხედავად "საქართველოსა და ქართველი ხალხის თანადგომისა".

"უკრაინა იმ ქვეყანას რომლის მიმართაც დიპლომატიური დემარში აქვს გამოცხადებული მის უმაღლეს საკანონმდებლო ორგანოს არ მიმართავს იმ თხოვნით, რომ პარლამენტმა მას უმასპინძლოს. ვითარებაში, როდესაც თავად ქვეყანას აქვს დიპლომატიური დემარში გამოცხადებული", — ამბობს პაპუაშვილი.

პარლამენტის თავმჯდომარემ კიდევ ერთხელ გაიმეორა, რომ ვოლოდიმირ ზელენსკის არ გამოუთქვამს სურვილი ჩართვოდა საქართველოს პარლამენტს. ლელოს დეპუტატმა სალომე სამადაშვილმა კი კითხვის დასმის დროს პაპუაშვილს უთხრა, რომ, მისი ინფორმაციით, სხვა ქვეყნის პარლამენტები ზელენსკის თავად მიმართავენ.

2 ივნისს პრეზიდენტმა, სალომე ზურაბიშვილმა განაცხადა, რომ უკრაინის პრეზიდენტი ვოლოდიმირ ზელენსკი მორალური სოლიდარობის ნიშნად საქართველოს პარლამენტში სიტყვით გამოსასვლელად უნდა მოგვეწვია. პაპუაშვილმა კი ზურაბიშვილის საპასუხოდაც თქვა, რომ ამის სურვილი თავად ზელენსკის არ გამოუთქვამს.

ომის დაწყების შემდეგ ზელენსკიმ არაერთი ქვეყნის პარლამენტს მიმართა, მათ შორის, გერმანიის, იაპონიის, შვედეთის, ფინეთისა და ა.შ.