პრეზიდენტ სალომე ზურაბიშვილის განცხადებით, უკრაინის პრეზიდენტი ვოლოდიმირ ზელენსკი მორალური სოლიდარობის ნიშნად საქართველოს პარლამენტში სიტყვით გამოსასვლელად უნდა მოგვეწვია. მისი თქმით, არავი გვთხოვს იმას, რაც ჩვენს ძალებს აღემატება და ეს ზელენსკის მოწვევა არაფერს ითხოვს სხვას, გარდა ტოტალური მორალური სოლიდარობისა.

"არავინ არ გვთხოვს ჩვენ იმას, რაც ჩვენს ძალებზე მეტია, მაგრამ მორალური სოლიდარობა გვევალება. მაგალითად, ჩვენ ვართ ალბათ ერთ-ერთი ქვეყანა ევროპაში დარჩენილი ცოტა ქვეყნიდან, სადაც პარლამენტში არ მიეცა საშუალება ზელენსკის, რომ გამოსულიყო სიტყვით. ეს ხომ არაფერს არ ითხოვს სხვას, გარდა ტოტალური მორალური სოლიდარობისა. [...] მე ვაფასებ პოლიტიკას და ფაქტებს. ვინც მიიღებს როგორც ისარს თავის მიმართ, იმან მიიღოს. მე ვამბობ, რომ ჩვენ უნდა მოგვეწვია ზელენსკი საქართველოს პარლამენტში", — თქვა ზურაბიშვილმა პალიტრანიუსის ეთერში.

პრეზიდენტის განცხადებით, 26 მაისს პარლამენტის ფასადზე საქართველოს და ევროკავშირის დროშებთან ერთად უკრაინის და მოლდოვისაც უნდა ყოფილიყო, რადგან ეს დღე ევროინტეგრაციას უკავშირდებოდა.

"მე მგონია, ეს ჩემი შეხედულებაა, რომ 26 მაისს, დღეს, რომელიც იყო ევროინტეგრაციის ეგიდის ქვეშ, პარლამენტის ფასადზე, სადაც იყო ევროპული და ცხადია საქართველოს დროშა, შეიძლება, ყოფილიყო უკრაინის და მოლდოვის დროშები", — ამბობს ის პალიტრანიუსის ეთერში.

ჟურნალისტის კითხვას შესთავაზა თუ არა ეს იდეა ხელისუფლებას, მან არ უპასუხა და თქვა, რომ ამას მნიშვნელობა არ აქვს. ზურაბიშვილმა აღნიშნა ისიც, რომ უნდა ვიცოდეთ როგორ ვიყოთ მადლიერები უკრაინის მიმართ.