დიდ ბრიტანეთში 4-დღიანი სამუშაო კვირის ეფექტიანობის შესამოწმებელი ყველაზე მასშტაბური პროექტი იწყება. 70 კომპანიის 3 300 დასაქმებული დღეიდან კვირაში 4 დღე ანაზღაურების შემცირების გარეშე იმუშავებს.

პროექტი 100:80:100 მოდელს ეფუძნება — 100%-იანი ანაზღაურება დროის 80%-ისთვის იმ პირობით, რომ პროდუქტიულობის 100% შენარჩუნებული იქნება. კვლევას კემბრიჯის უნივერსიტეტის, ოქსფორდის უნივერსიტეტისა და ბოსტონის კოლეჯის პროფესორები საერთაშორისო ორგანიზაციებთან ერთად უძღვებიან. პროექტი 6 თვის განმავლობაში გაგრძელდება.

ბოსტონის კოლეჯის პროფესორის, ჯულიეტ შორის თქმით, პროექტის ფარგლებში გამოიკვლევენ, თუ რა გავლენა ექნება მოდელს დასაქმებულებზე, კომპანიასა და გარემოზე — როგორ შეიცვლება დასაქმებულების პროდუქტიულობა, ჯანმრთელობა, ძილის ხარისხი და სხვ. მან პროექტს "ისტორიული კვლევა" უწოდა.

4-დღიანი სამუშაო კვირა უკვე უდიდეს წარმატებად შეაფასეს ისლანდიაში. ჩატარებულმა ცდებმა აჩვენა, რომ დასაქმებულებში სტრესის დონე შემცირდა და მათ უკეთ შეუძლიათ სამსახურისა და პირადი ცხოვრების ბალანსირება. მსგავს მოდელზე ბელგიაც გადავიდა. 2021 წლის დეკემბერში არაბთა გაერთიანებული საემიროები 4,5-დღიან სამუშაო კვირაზე გადავიდა, ხოლო პორტუგალიაში დამსაქმებელს არასამუშაო საათებში დასაქმებულის შეწუხება აეკრძალა.

ამავე თემაზე: