ბელგიის ახალი საკანონმდებლო ცვლილებების მიხედვით, დასაქმებულებს ამიერიდან 4-დღიანი სამუშაო კვირის მოთხოვნის უფლება აქვთ. კვირის განმავლობაში სამუშაო საათების რაოდენობა და ანაზღაურება უცვლელია, თუმცა არჩევანის შემთხვევაში, დასაქმებულებს შეუძლიათ, კვირაში 5-ის ნაცვლად 4 დღე იმუშავონ.

ახალი კანონის მიხედვით, დამსაქმებელს 4-დღიანი სამუშაო კვირის მოთხოვნაზე უარის თქმა შეუძლია, თუმცა ეს უარი აუცილებლად დასაბუთებული უნდა იყოს. ბელგიის პრემიერმინისტრის თქმით, ახალი ცვლილებების მიზანი პროდუქტიული სამუშაო გარემოს შექმნაა და ის პანდემიის დროს შეცვლილი სამუშაო რეჟიმის გავლენით დაინერგა.

"ორი რთული წელი გავიარეთ. ამ გადაწყვეტილებით მწვანე შუქი ავუნთეთ უფრო ინოვაციურ, მდგრად და ციფრულ ეკონომიკას. ჩვენი მიზანი ხალხისა და ბიზნესის გაძლიერებაა", — განაცხადა პრემიერმინისტრმა.

ახალი ცვლილებები დამატებით ითვალისწინებს დასაქმებულის უფლებას, სამუშაო საათების შემდეგ სამსახურთან დაკავშირებულ ზარებსა თუ შეტყობინებებს არ უპასუხოს. ამასთანავე, მცოცავი გრაფიკის მქონე დასაქმებულებს მომავალი სამუშაო საათები 7 დღით ადრე ეცოდინებათ.

ბელგია ერთადერთი ქვეყანა არაა, რომელმაც სამუშაო დღეების რაოდენობა შეამცირა. 2020 წელს ისლანდიაში 4-დღიანი სამუშაო კვირის მოდელი მკვლევრებმა უდიდეს წარმატებად შეაფასეს. 2021 წლის დეკემბერში არაბთა გაერთიანებული საემიროები 4,5-დღიან სამუშაო კვირაზე გადავიდა, ხოლო პორტუგალიაში დამსაქმებელს არასამუშაო საათებში დასაქმებულის შეწუხება აეკრძალა.

რაც შეეხება საქართველოს, ოქტომბერში ქართული საწარმო ტენე 4-დღიან სამუშაო კვირაზე გადავიდა. ახალ სამუშაო რეჟიმზე გადასვლით დასაქმებულები ხუთი დღის განმავლობაში 8-საათიანი მუშაობის ნაცვლად, 4 დღე 10-10 საათის განმავლობაში მუშაობენ, დარჩენილი 3 დღე კი ისვენებენ.

ამავე თემაზე: