Reuters წყაროებზე დაყრდნობით წერს, რომ გერმანიამ და იტალიამ კომპანიებს უფლება მისცეს, გახსნან რუბლის ანგარიშები, რათა გაზის ყიდვა მოსკოვის წინააღმდეგ დაწესებული სანქციების დარღვევის გარეშე შეძლონ.

გამოცემის ინფორმაციით, ამას წინ უძღოდა ევროკავშირთან დისკუსიები. პოლონეთმა, ბულგარეთმა და ფინეთმა ამ მოთხოვნაზე უარი განაცხადეს, ამიტომ მათ რუსული გაზის მიწოდება შეუწყდათ.

"დებატებმა რუსეთის მოთხოვნაზე, უცხოელმა მყიდველებმა გაზის საფასური რუბლებში გადაიხადონ, გამოსცადა ევროპული მთავრობების გადაწყვეტილება, მკაცრი პოზიცია დაიკავონ მოსკოვის წინააღმდეგ უკრაინაში ომის გამო", — წერს გამოცემა.

მათივე ინფორმაციით, ბრიუსელმა გასცა ორი წერილობითი ინსტრუქცია იმის შესახებ, თუ როგორ უნდა იყიდონ რუსული გაზი სანქციების დარღვევის გარეშე, მაგრამ ლეგალური მარშრუტი კვლავ ბუნდოვანია, რადგან ევროკავშირის ოფიციალურმა წარმომადგენლებმა დახურულ შეხვედრაზე კომპანიებს ურჩიეს, არ გახსნან რუბლის ანგარიშები გაზპრომბანკში.

"ბრიუსელში მყოფმა ზოგიერთმა დიპლომატმა ევროკავშირის წევრი ქვეყნებიდან განაცხადა, რომ მათი აზრით, რჩევა მიზანმიმართულად ბუნდოვანია, რათა ქვეყნებს საშუალება მისცენ, გახსნან რუბლის ანგარიში და განაგრძონ რუსული გაზის შეძენა", — წერს გამოცემა.

რუსეთმა ბულგარეთსა და პოლონეთს რუსეთმა გაზის მიწოდება 27 აპრილს შეუწყვიტა, ფინეთს კი 21 მაისს. ეს მას შემდეგ მოხდა, რაც რუსეთმა განაცხადა, რომ "არამეგობრულმა ქვეყნებმა" გაზის საფასურის გადახდა რუბლში უნდა დაიწყონ, რაზეც ამ ქევყნებმა უარი თქვეს.

ევროკომისიის პრეზიდენტმა, ურსულა ფონ დერ ლაიენმა განაცხადა, რომ ქვეყნები, რომლებსაც რუსეთმა გაზის მიწოდება შეუწყვიტა, ახლა გაზს იღებენ ევროკავშირის წევრი მეზობლებისგან. ლაიენის თქმით, გაზის მიწოდების შეწყვეტა კიდევ ერთი პროვოკაციაა კრემლისგან.

გაიგეთ მეტი:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში