უკრაინის პრეზიდენტის, ვოლოდიმირ ზელენსკის განცხადებით, რუსეთისთვის არა მხოლოდ გაზი, არამედ ყველანაირი ვაჭრობა იარაღია, რომლის ევროპელების წინააღმდეგ გამოყენებისთვის ის შესაფერის მომენტს ელოდება. ამის შესახებ ზელენსკიმ მორიგ ვიდეოში ისაუბრა.

"ამ კვირაში რუსეთის ხელმძღვანელობამ ევროპელების ენერგორესურსებზე შანტაჟის ახალი სერია დაიწყო — პოლონეთისა და ბულგარეთისთვის გაზის მიწოდების შეწყვეტის გადაწყვეტილება კიდევ ერთი არგუმენტია იმის, რომ რუსეთთან ნორმალური ეკონომიკური თანამშრომლობის შენარჩუნების იმედი ევროპაში არავის უნდა ჰქონდეს. რუსეთი არა მხოლოდ გაზს, არამედ ნებისმიერ ვაჭრობას იარაღად განიხილავს. ის უბრალოდ ელოდება მომენტს, როცა ვაჭრობის ამა თუ იმ არეალს გამოიყენებს", — განაცხადა მან.

რუსეთი პოლონეთსა და ბულგარეთს ბუნებრივი აირის მიწოდებას უჩერებს. ინფორმაცია 27 აპრილს გახდა ცნობილი. ეს მას შემდეგ მოხდა, რაც რუსეთმა განაცხადა, რომ "არამეგობრულმა ქვეყნებმა" გაზის საფასურის გადახდა რუბლში უნდა დაიწყონ, რაზეც ბულგარეთმა და პოლონეთმა უარი თქვეს.

ევროკომისიის პრეზიდენტმა, ურსულა ფონ დერ ლაიენმა განაცხადა, რომ პოლონეთი და ბულგარეთი, რომლებსაც რუსეთმა გაზის მიწოდება შეუწყვიტა, ახლა გაზს იღებენ ევროკავშირის წევრი მეზობლებისგან. ლაიენის თქმით, გაზის მიწოდების შეწყვეტა კიდევ ერთი პროვოკაციაა კრემლისგან.