საქართველოს ეროვნული ბანკის 2016 წლის ანგარიშის მიხედვით, გასულ წელს ინფლაციის მიზნობრივი მაჩვენებელი ხუთი პროცენტი იყო. უწყების ინფორმაციით, იგივე მონაცემი 2017 წლისთვის ოთხი პროცენტია, მომავალი წლიდან კი სამ პროცენტამდე მცირდება.

2016 წლის ბოლოსათვის სამომხმარებლო ფასების წლიური ინფლაცია 1,8 პროცენტი და საშუალო წლიური ინფლაცია 2,1 პროცენტი იყო. ბანკის მონაცემებით, ბოლო სამი წლის განმავლობაში წლიური ინფლაცია, საშუალოდ, 3,1 პროცენტს უტოლდება.

"საბაზო ინფლაციის მაჩვენებელი მთლიან ინფლაციაზე მაღალი იყო, რაც სურსათის დაბალმა ინფლაციამ და ენერგომატარებლებზე ფასების შემცირებამ გამოიწვია," - აღნიშნულია ანგარიშში.

ეროვნულ ბანკში აღნიშნავენ, რომ 2016 წლის განმავლობაში ინფლაცია საბაზო ეფექტის გამო შემცირდა. მათივე ინფორმაციით, 2015 წელს ალკოჰოლურ სასმელებზე აქციზის გადასახადის ზრდის, ელექტროენერგიის ტარიფების მატებისა და გაცვლითი კურსის გაუფასურების შედეგად სამომხმარებლო კალათის ხანგრძლივი მოხმარების საქონელზე ფასების ზრდის ერთჯერადი ეფექტი 2016 წელს ამოიწურა. თუმცა, განმარტებულია, რომ ინფლაციის შემცირებას მოთხოვნის მხრიდან მოქმედი ფაქტორებიც განაპირობებდა.

"2016 წელს მსოფლიო ბაზარზე ნავთობის ფასები წინა წელთან შედარებით, ძირითადად, შემცირებული იყო, რის გამოც მთელი წლის მანძილზე ინფლაციის შემცირების მიმართულებით მოქმედებდა, თუმცა ივლისიდან ამ ფაქტორმა თანდათან ამოწურვა დაიწყო," - ვკითხულობთ ანგარიშში.

მათივე განმარტებით, 2016 წელს გაგრძელდა საგარეო შოკების გადმოცემა საქართველოს ეკონომიკაზე და წლის დასაწყისში ძირითადი სავაჭრო პარტნიორი ქვეყნების ეკონომიკები კვლავ შესუსტებული იყო, თუმცა, მათი გავლენა საქართველოს ეკონომიკაზე თანდათანობით ნეიტრალდებოდა.

საქართველოს კანონმდებლობის მიხედვით, საქართველოს ეროვნული ბანკი პარლამენტს ყოველწლიურ ანგარიშს მომდევნო წლის პირველ მაისამდე წარუდგენს. წლიურ ანგარიშში განხილულია ის პრიორიტეტული მიმართულებები, რომლებითაც ხელმძღვანელობდა ქვეყნის ცენტრალური ბანკი საანგარიშო პერიოდში. გარდა ამისა, ბანკის შეფასებები ქვეყანაში და მის ფარგლებს გარეთ მიმდინარე პროცესებზე, რომლებიც გავლენას ახდენდა საქართველოს ეკონომიკის მდგომარეობასა და ეროვნული ბანკის მიერ დასახული ამოცანების შესრულებაზე.