საქართველოს ეროვნული ბანკის 2016 წლის ანგარიშის მიხედვით, გასულ წელს ეკონომიკური ზრდის მთავარი მამოძრავებელი სამშენებლო დარგი იყო. ეს დარგი 8,1 პროცენტით გაიზარდა და ეკონომიკური ზრდის ყველაზე დიდი წილი - 0,6 პროცენტი შეადგინა. მშენებლობის ზრდა მაღალი იყო როგორც მთავრობის მიერ დაფინანსებული ინფრასტრუქტურული პროექტების კუთხით, ასევე კერძო სექტორის მშენებლობებში.

მთლიანი შიდა პროდუქტების ზრდაზე გავლენა ჰქონდა დამამუშავებელ მრეწველობას (0,4%). გასულ წელს 2015 წელთან შედარებით ეს მაჩვენებელი 4,8 პროცენტითაა გაზრდილი.

"უმსხვილესი დარგის, ვაჭრობის ზრდის ტემპი წინა წელთან შედარებით გაიზარდა და 1,8 პროცენტი შეადგინა. ვაჭრობის ზრდა მნიშვნელოვანია საქართველოს ეკონომიკისთვის, რადგანაც ამ დარგში კერძო სექტორში დასაქმებულთა ყველაზე დიდი ჯგუფი მუშაობს," - ვკითხულობთ ანგარიშში.

ამავე ანგარიშის მიხედვით, მაღალი იყო მოთხოვნა სესხებზე, განსაკუთრებით უძრავი ქონების ბაზრიდან. ამ დარგში ზრდა 6,8 პროცენტი იყო, რაც მშპ-ს ზრდის 0,4 პროცენტია.

"სასტუმროები და რესტორნების დარგში ყველაზე მაღალი ზრდა დაფიქსირდა, რაც ზოგადად ტურიზმის და ტურისტული შემოსავლების მატების შედეგია. მომსახურების სექტორიდან აღსანიშნავია სატრანსპორტო მომსახურების დარგის შემცირება, რაც ძირითადად სარკინიგზო გადაზიდვების ხარჯზე მოდის," - ვკითხულობთ ანაგარიშში.

გასულ წელს ეკონომიკური ზრდა 2,7 პროცენტი იყო. ამ მაჩვენებლიდან დიდი წილი (1,5%) მომსახურების დარგებზე მოდის, შედარებით ნაკლები (1,2%) კი ინდუსტრიულ დარგებზე.

საქართველოს კანონმდებლობის მიხედვით, საქართველოს ეროვნული ბანკი პარლამენტს ყოველწლიურ ანგარიშსს მომდევნო წლის პირველ მაისამდე წარუდგენს. წლიურ ანგარიშში განხილულია ის პრიორიტეტული მიმართულებები, რომლებითაც ხელმძღვანელობდა ქვეყნის ცენტრალური ბანკი საანგარიშო პერიოდში. გარდა ამისა, ბანკის შეფასებები ქვეყანაში და მის ფარგლებს გარეთ მიმდინარე პროცესებზე, რომლებიც გავლენას ახდენდა საქართველოს ეკონომიკის მდგომარეობასა და ეროვნული ბანკის მიერ დასახული ამოცანების შესრულებაზე.