ქალაქ რუსთავში ქართული წარმოების პლასტმასის შესაფუთ საწარმოს — კავკასპაკს ამერიკის შეერთებული შტატების ელჩი, კელი დეგნანი ეწვია. ვიზიტის ფარგლებში საწარმო, ასევე, USAID საქართველოს ოფისის და USAID-ის ეკონომიკური უსაფრთხოების პროგრამის წარმომადგენლებმაც დაათვალიერეს.

გარემოს დაცვისა და ეკოლოგიის მიმართ საზოგადოების მაღალი ინტერესის გათვალისწინებით, საქართველოსთვის მნიშვნელოვანი სიახლეს წარმოადგენს ის, რომ საწარმო კავკასფექი პოზიციონირდება, როგორც ცირკულარული ეკონომიკის პრეცედენტი (blueprint) საქართველოში.

"საკვები და არასაკვები პროდუქტებისათვის გადამუშავებული და გადამუშავებადი პლასტმასის შესაფუთების შექმნა და მისი ექსპორტზე გატანა, საერთაშორისო ბრენდებთან თანამშრომლობის გზით, კომპანიის ერთ-ერთი მთავარი გამოწვევაა", — ამბობს კავკასპაკის მმართველი პარტნიორი, ამირან ცერცვაძე.

USAID-ის ეკონომიკური უსაფრთხოების პროგრამის ფარგლებში (USAID Economic Security Program), კომპანიამ წარმადობის ზრდისთვის ხელშეწყობის საგრანტო კონკურსში გაიმარჯვა. USAID-ის პროგრამამ, კონკურსის თანახმად, კომპანიას შესაბამისი თანამედროვე აღჭურვილობა გადასცა. ამან, შედეგად, პროექტით გათვალისწინებული წარმადობისა და ენერგოეფექტიანობის ზრდა გამოიწვია.

კომპანია კავკასპაკის მიერ წარმოებული პროდუქტით ისეთი ქვეყნების ბაზრები მარაგდება, როგორებიცაა აშშ, კანადა, პანამა, აზერბაიჯანი, თურქეთი და სომხეთი. მეტიც, იგი აშშ-ის სუპერმარკეტების გიგანტური ქსელის — Walmart-ის შესაფუთი საშუალებების ერთადერთი ექსპორტიორია საქართველოდან.

სწორედ ამ თემის გარშემო არსებული ინტერესის საფუძველზე, საწარმოს ამერიკის ელჩი, კელი დეგნანი და USAID-ის დელეგაცია ეწვია. სტუმრები უახლესი აღჭურვილობის მუშაობის სისტემას გაეცნენ, დაესწრნენ ექსპორტის პროცედურებს, დაათვალიერეს საწარმო და უკვე წარმოებული პროდუქტი.

ქართული კაპიტალით შექმნილი შესაფუთი საშუალებების საწარმო კავკასპაკი 14 წლიანი გამოცდილების მქონე კომპანიაა, რომელიც საკვები და არასაკვები პროდუქტებისათვის გადამუშავებული და გადამუშავებადი პლასტმასისგან შესაფუთ მასალებს აწარმოებს.

კომპანია, რომელშიც 110 თანამშრომელია დასაქმებული, სერტიფიცირებულია ISO და BRC საერთაშორისო ხარისხის სერტიფიკატებით.

კავკასპაკი ახლო მომავალში საექსპორტო ბაზრების გაფართოებას, კერძოდ კი ევროკავშირის ქვეყნებში პროდუქტის გატანას გეგმავს. წარმომადგენლის თქმით, კომპანია ყველაზე მეტადაა დაინტერესებული იმაში, რომ პლასტმასის ნარჩენების გარემოში მოხვედრის ნაცვლად მათი შეგროვება და გადამუშავება მოხდეს. გარდა ამისა, კავკასპაკისთვის მნიშვნელოვანია ახალი სტანდარტების თანმიმდევრული დანერგვა, ყოველდღიური შრომა და პროგრესი პოზიტიური ცვლილებებისთვის.

აღსანიშნავია ისიც, რომ კომპანიას მიღებული აქვს აწარმოე საქართველოსა და შეღავათიანი პროექტის მხარდაჭერა.

რაც შეეხება საქართველოში USAID-ის საქმიანობას, უკანასკნელი 30 წლის განმავლობაში ამერიკელმა ხალხმა ამ ორგანიზაციის საშუალებით ჩვენს ქვეყანაში 1.8 მილიარდი აშშ დოლარის ინვესტიცია ჩადო. USAID-ის პროექტების მიზანია, საქართველოს თავისუფალი და განვითარებული დემოკრატიის პრინციპების დანერგვაში დაეხმაროს. ორგანიზაცია ეკონომიკურ და ჰუმანიტარულ დახმარებას 100-ზე მეტ ქვეყანას უწევს. დამატებითი ინფორმაციისთვის ეწვიეთ ვებგვერდს.

ბოლოს კი უნდა აღინიშნოს USAID-ის ეკონომიკური უსაფრთხოების პროგრამა, რომელსაც უკვე ხუთი წელია, DAI Global ახორციელებს. პროგრამა 23 მილიონი დოლარითაა დაფინანსებული და მისი მიზანი სოფლის მეურნეობის მიღმა არსებული სექტორების განვითარების ხელშეწყობაა. ამ გზით ორგანიზაცია სამუშაო ადგილების შექმნას, ინვესტიციების მოზიდვას, მიკრო, მცირე და საშუალო საწარმოებისთვის შემოსავლების ზრდის პოტენციალის გაჩენას გეგმავს.