პრემიერმინისტრის, ირაკლი ღარიბაშვილის განცხადებით, ჯიქიას ქუჩაზე 1 000-ბინიანი პოლიციის ქალაქის აშენებას აპირებენ. მისი თქმით, მოსამზადებული სამუშაოები უკვე დაწყებულია.

"ჩემი დიდი სურვილია და ბატონი მინისტრის, ჩვენ ერთობლივად გადავწყვიტეთ, რომ ჩვენი გმირი პოლიციელებისთვის ავაშენებთ 1 000-ბინიან პოლიციის ქალაქს. ამ პროექტსაც დავიწყებთ ამ წელს. უკვე დაწყებული გვაქვს მოსამზადებელი სამუშაოები. ადგილიც შერჩეულია.

ბატონი ვახტანგის იდეა იყო, რომ აღნიშნული პროექტი განხორციელდეს ჯიქიას ქუჩაზე, სადაც იყო მანამდე განთავსებული პოლიციის ქვედანიშნულების ბაზა. აღნიშნული ბაზა გადატანილ იქნა სხვა ადგილას. ასე, რომ ამ ადგილზე აშენდება 1 000-ბინიანი საცხოვრებელი კომპლექსი, პოლიციის ქალაქი, ისეთივე, როგორიც ჩვენ ავაშენეთ ჩვენი გმირი ჯარისკაცებისთვის ჩემი მინისტრობის დროს. გახსოვთ, რომ 1 000-ბინიანი ჯარის ქალაქი ავაშენეთ, რომელიც წელს, სექტემბერში ჩაბარდება ჩვენს ჯარისკაცებს. ასეთივე, ანალოგიური აშენდება პოლიციელებისთვის", — აცხადებს პრემიერმინისტრი.

მისივე თქმით, პირობები იქნება იგივე, რაც იყო ჯარისთვის.