თამაზ ტყემალაძეს, რომელიც 2013 წელს საზოგადოებრივი მაუწყებლის გენერალური დირექტორის მოვალეობას ასრულებდა, ახლა კი, მისი თქმით, სამაუწყებლო ენის მთავარი რედაქტორის თანამდებობას იკავებს, ახალი გადაცემის იდეა აქვს.

ტყემალაძეს სურს გადაცემა თექვსმეტსაკნოვანი მთლიანობა დაიწყოს. იდეა უკვე წარადგინა საზოგადოებრივი მაუწყებლის გადაცემების კონკურსშიც. გადაცემა 12-კაციანმა ჟიურიმ უნდა შეაფასოს.

"თუ კიდევ რამე სხივს შევმატებ ამ გასაცოდავებულ ტელევიზიას, რომელიც გაასაცოდავეს უნიჭო, უგულო და უსინდისო ადამიანებმა, ბედნიერი ვიქნები," - ამბობს ტყემალაძე.

მისი თქმით, მისი იდეაა გადაცემები ქართულ კლასიკურ მწერლობას - ძველ, ახალ და უახლეს ნაწარმოებებს დაუთმოს.

"ჩემთან ერთად მონაწილეობას მიიღებენ გამოჩენილი კრიტიკოსები და მწერლები და ვილაპარაკებთ ხან გრიგოლ ხანძთელზე, ხან ილიაზე, ხან ბარათაშვილზე. ნაკლებად თანამედროვე მწერლობაზე, ასე რომ ვთქვათ, უფრო მე-19 საუკუნეა ჩემი ძირითადი ასპარეზი და უკან და უკან. შეიძლება მეც ვიყო წამყვანი, სიმართლე გითხრათ მეზარება კიდეც," - ამბობს ტყემალაძე ახალ გადაცემაზე საუბრისას.

დღეს საზოგადოებრივ მაუწყებელზე ტყემალაძე ერთი გადაცემის წამყვანი უკვე არის. რადიოგადაცემაში თამაზ ტყემალაძის ლიტერატურული საუბრები უკვე ისაუბრეს ვაჟა-ფშაველასა და ნიკოლოზ ბარათაშვილის შესახებ. შემდეგი, ვის შესახებაც ტყემალაძე გადაცემას მოამზადებს, ილია ჭავჭავაძეა.

"უზარმაზარი რეიტინგი აქვს და ასეთი გამოხმაურება, რეიტინგი მანდ არცერთ გადაცემას ჰქონია," - ასე აფასებს ტყემალაძე საკუთარ გადაცემას.

მისი თქმით, მის ძველ სატელევიზიო გადაცემას - ეს საქართველოა ტელეკომპანია იმედისა და რუსთავი 2-ის ეთერში იმ დროს გასულ პროგრამებზე მაღალი რეიტინგი ჰქონდა. თუმცა, ამბობს, რომ არხის მენეჯმენტის გადაწყვეტილებით მოიხსნა.