საქართველოს საზოგადოებრივი მაუწყებლის პირველადი პროფკავშირისგანცხადებით, მაუწყებლის მენეჯმენტის ნაწილთან 30 მაისს გამართული 3,5-საათიანი შეხვედრა კონკრეტული შედეგის გარეშე დასრულდა. პროფკავშირის განცხადებით, რომელიც მაუწყებლის ათეულობით თანამშრომელს აერთიანებს, მენეჯმენტმა მზადყოფნა გამოთქვა, 14 მოთხოვნიდან დაკმაყოფილდეს 10.

მიუხედავად ამისა, მაუწყებლის თანამშრომლები უკმაყოფილებას მაინც გამოხატავენ:

"მიუხედავად ჩვენი დიდი სურვილისა, დღევანდელ შეხვედრაზე მენეჯმენტმა თავი აარიდა ჩვენს მთავარ მოთხოვნაზე საუბარს. ხელფასების ზრდაზე ჩვენ მომდევნო შეხვედრაზე ვისაუბრებთ. შეხვედრას არ ესწრებოდნენ ბორდის ხელმძღვანელი პირები და წევრები. ასევე არხის მენეჯმენტის ფინანსური ნაწილის წარმომადგენლები.

ჩვენი პოზიცია ისევ ნათელია: ჩვენ არ გვქონდა იმის ილუზია, რომ ტელევიზიის პრობლემები ერთი ხელის მოსმით მოგვარდებოდა, რაც წლების მანძილზე მენეჯმენტის შეცდომებისა და უპასუხისმგებლობის ბრალია. ჩვენ დავინახეთ მენეჯმენტის მხრიდან მზაობა იმის შესახებ, რომ
დიალოგის რეჟიმში გადავწყვიტოთ პრობლემები, თუმცა რიგ შემთხვევებში ამ მზაობის მიღმა კონკრეტული ქმედებები არ ჩანდა.

იმედს ვიტოვებთ, რომ აღნიშნული კეთილგანწყობა არ არის ტყუილის და იმ პოლიტიკის ნაწილი რის გამოც ჩვენი პროტესტი დაიწყო".

საზოგადოებრივი მაუწყებლის თანამშრომელთა ნაწილმა, რომელთა შორის არიან მოამბის ჟურნალისტები, მემონტაჟეები და ტექნიკური პერსონალი, 18 მაისს, მაუწყებლის წინ გამაფრთხილებელი აქცია გამართა. ისინი მაუწყებლისგან სამუშაო პირობების გაუმჯობესებასა და ხელფასების მომატებას ითხოვენ. მაუწყებლის მენეჯმენტის განცხადებით კი, მიმდინარეობს ორგანიზაციის რეფორმირება, რის შემდეგაც, შესაძლოა გადაიხედოს ხელფასები და თანამშრომელთა ნაწილს სამსახურის დატოვებაც მოუწიოს.