მარნეულელი აქტივისტის, სამირა ბაირამოვას განცხადებით, ალტ-ინფოს ოფისზე ბანერების შეღებვის შემდეგ მუქარას არამხოლოდ ის, არამედ მისი მხარდამჭერებიც იღებენ. ბაირამოვა On.ge-სთან ამბობს, რომ შეურაცხმყოფელ და დამამცირებელ შეტყობინებებს უგზავნიან იმ ადამიანებს, ვინც ადგილობრივ დონეზე საჯაროდ მხარს უჭერს მას. აქტივისტი ამბობს, რომ რეალურ საფრთხეს ხედავს.

"ვიცი, რომ ესენი არიან ნამდვილად ძალიან საშიში და ბნელი ადამიანები და ძალიან რეალურ საფრთხეს ვხედავ არა მარტო ჩემთვის, არამედ იმ ადამიანებისთვისაც, ვინც საჯაროდ მხარს მიჭერს და მზად არიან თანამშრომლობისთვის. ასევე, იგივე შეტყობინება და გინება და ლანძღვა არის ადგილობრივი ჟურნალისტების მიმართაც, ვინც წერენ ნიუსებს და ასევე, რადიო მარნეულის საიტზე ძალიან ბევრი მსგავსი შეტყობინება და კომენტარებია", — ამბობს ის.

აქტივისტი აღნიშნავს, რომ ახლა ალტ-ინფოს წევრები, რომლებიც, აქამდე ასევე ძალადობრივ, პრორუსულ და ჰომოფობიურ ქართულ მარშში იყვნენ, მის მიმართ საფრთხისშემცველ ქმედებებს ადრეც ახორციელებდნენ.

"ჩვენ ერთ ქალაქში ვცხოვრობთ. შორიდან მითვალთვალებდნენ, ხან მაშინებდნენ, ხან მაგინებდნენ. ცდილობდნენ ფიზიკური ზიანის მოყენებას, გაჩერებასთან რომ ვიყავი და მანქანებით ვითომ რომ უნდოდათ შემჯახებოდნენ და ა.შ. ასეთ ქმედებებს ახორციელებდნენ", — თქვა მან.

სამირამ შინაგან საქმეთა სამინისტროს პირველი მუქარიდან მალევე მიმართა. აქტივისტი ამბობს, რომ გამოძიების იმედი დიდად არ აქვს, რადგან წარსულში მსგავს შემთხვევებზე საგამოძიებო უწყებას სათანადო ან საერთოდ არ ჰქონია რეაგირება.

"დღემდე არაერთი ყოფილა მსგავსი მუქარა, წერილობით ან ტელეფონით ან შეტყობინებით და შესაბამისად, ადრე ხშირად მიმიმართავს პოლიციისთვის, რამდენჯერ მომივიდა პასუხი, რომ აქ ვერ ხედავენ დანაშაულებრივ ნიშნებს და შეწყდა გამოძიება. და ზოგ ჩემს განცხადებაზე საერთოდ პასუხი არ მომწერეს, ამიტომ დიდად იმედი არ მაქვს. მე მაინც ჩემი გასაკეთებელი გავაკეთე, შევიტანე პოლიციაში და იქნებ ახლა რაღაც ეფექტი ჰქონდეს", — გვითხრა მან.

ამ საქმეზე სამირა უკვე დაკითხეს, შსს-მ კი გამოძიება სისხლის სამართლის 151-ე მუხლით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.

აღსანიშნია, რომ სამირას წინააღმდეგ სარჩელი ძალადობრივი ჯგუფის ადგილობრივი ოფისის წარმომადგენელმა, ჯონი ქოჩქიანმაც შეიტანა და ოფისის დაზიანებისთვის "ზარალის" ანაზღაურებას მოითხოვა. "ზიანი" სამირას მიერ უკრაინისა და ევროკავშირის დროშის ფერებში შეღებილი ბანერებია.

შინაგან საქმეთა სამინისტროში ამ დრომდე ვერ გვპასუხობენ, დაიწყო თუ არა გამოძიება ქოჩქიანის საჩივრის საფუძველზე, თუმცა სამირამ აღნიშნა, რომ უწყებამ საქმე აღძრა, მაგრამ მან საჩივრის ოქმს ხელი არ მოაწერა.