სასჯელაღსრულებისა და პრობაციის სამინისტრომ პენიტენციურ დაწესებულებებში დედამიწის საერთაშორისო დღის აღსანიშნავად გამწვანების აქცია მოაწყო. აქციის ფარგლებში მსჯავრდებულებმა დაწესებულებების ეზოებსა და სკვერებში ყვავილები, ბუჩქები და ფოთლოვანი ჯიშის ხეები დარგეს.

ღონისძიებები სასჯელაღსრულებისა და პრობაციის სამინისტროს ინიციატივით ჩატარდა. #16 პენიტენციურ დაწესებულებაში დედამიწის საერთაშორისო დღე გამწვანების აქციის გარდა სხვა ღონისძიებებითაც აღინიშნა.

ჩატარდა ელექტრონული მუსიკის კონცერტი, სადაც მსჯავრდებულები მათ მიერ შექმნილი მუსიკალური პერფორმანსით წარსდგნენ.

22 აპრილს დედამიწის დღე აღინიშნება. პირველად ეს დღე 1970 წელს აღინიშნა, როცა ცნობილი ამერიკელი გარემოსდამცველი სენატორის, გეილორდ ნელსონის მოწოდებით 20 მილიონი ამერიკელი გამოვიდა დედამიწის დასაცავად. დედამიწის დღე მსოფლიოში ერთ-ერთი ყველაზე მასშტაბური გარემოსდაცვითი ღონისძიებაა, რომელშიც ყოველ წელს მსოფლიოს 175 ქვეყნის 17 000-მდე ორგანიზაცია და მილიონობით მოხალისე მონაწილეობს.