არასამთავრობო ორგანიზაციების ნაწილი, საზოგადოებრივი ორგანიზაციები, კვლევითი ცენტრები და დამოუკიდებელი მოქალაქეები კონსტიტუციაში "თავისუფლების აქტის" გაუქმების მოთხოვნით კამპანიას იწყებენ. ამის შესახებ მათ ერთობლივი განცხადება დღეს, 21 აპრილს გაავრცელეს.

"საყოველთაოდ გაზიარებულია მოსაზრება, რომ დემოკრატიული კონსტიტუცია, როგორც სახელმწიფოებრივი ერთობის ფუძემდებლური დოკუმენტი, არ უნდა განსაზღვრავდეს კონკრეტულ ეკონომიკურ პოლიტიკას - ეკონომიკურ და საგადასახადო საკითხებზე დისკუსია მიმდინარე პოლიტიკური ცხოვრების ნაწილია. ასეთი ჩანაწერის არსებობა კონსტიტუციას იდეოლოგიურად შებოჭილ დოკუმენტად აქცევს და საფუძველშივე გამორიცხავს ხალხის მიერ კონსტიტუციურ დებულებათა პატივისცემასა და მათდამი ერთგულებას," - აღნიშნავენ "თავისუფლების აქტის" კონსტიტუციიდან ამოღების მსურველები.

მათ მიაჩნიათ, რომ გადასახადების ზრდის აკრძალვის შესახებ კონსტიტუციაში არსებული ჩანაწერი ზღუდავს წარმომადგენლობითი პოლიტიკური ორგანოების შესაძლებლობას, ეკონომიკური განვითარების სრულყოფილი გეგმა გააჩნდეთ და იზრუნონ რესურსების ქმედით და სამართლიან განაწილებაზე.

ამ მოსაზრებას იზიარებენ და საკონსტიტუციო კომისიას მიმართავენ:

  1. სოციალ-დემოკრატები საქართველოს განვითარებისთვის;
  2. საზოგადოებრივი კვლევის ცენტრი;
  3. სოლიდარობის ქსელი - მშრომელთა ცენტრი;
  4. ახალგაზრდა ბიზნესმენთა და ფინანსისტთა ასოციაცია;
  5. მედიაპორტალი European.ge;
  6. ბანკები და ფინანსები;
  7. სოციალური აზრის ფორუმი;
  8. ევროპული არჩევანი საქართველოსთვის;
  9. ურბანული კვლევების ცენტრი;
  10. ქალები სამართლიანობისათვის;
  11. სახალხო ეკონომიკის მოძრაობა;
  12. უხილავი შრომა;
  13. საქართველოს პროგრესული ფორუმი;
  14. საქართველოს მეტალურგიული, სამთო და ქიმიური მრეწველობის პროფკავშირი;
  15. იმერეთის მეტალურგიული პროფკავშირი;
  16. რკინიგზელთა ახალი პროფკავშირი;
  17. მასწავლებელთა პროფკავშირი;
  18. ტრანსპორტისა და გზების მუშაკთა პროფკავშირი;
  19. ურბან - რეაქტორი;
  20. აუდიტორია 115;
  21. ირიბი მოქმედების კიბერ-თეატრი;
  22. სახელოსნო პრაქსისი;
  23. Docomomo საქართველო;
  24. RED ფონდი (Research Education Development Foundation).