შვედეთში, კაროლინსკას ინსტიტუტისა და სტოკჰოლმის ეკონომიკის სკოლის მეცნიერების საერთო კვლევის მიხედვით, ორალურ კონტრაცეპტივებს ქალების ცხოვრების ხარისხზე უარყოფითი გავლენა აქვთ, თუმცა დეპრესიის სიმპტომებს არ ზრდიან. შედეგები სამეცნიერო ჟურნალ Fertility and Sterility-ში გამოქვეყნდა.

"იმის მიუხედავად, რომ მსოფლიოს გარშემო 100 მილიონ ქალზე მეტი ჰორმონალურ აბებს იღებს, დღესდღეისობით ცოტა ვიცით, თუ როგორ მოქმედებს ის მათ ჯანმრთელობაზე ან რა გვერდითი ეფექტები აქვს" - ამბობს კვლევის ერთ-ერთი ხელმძღვანელი და კაროლინსკას ინსტიტუტის პროფესორი ანჟელიკა ლინდენ ჰირშბერგი.

კვლევაში 18-დან 35 წლამდე ასაკის 340 ჯანმრთელი ქალი მონაწილეობდა, რომლებიც სამი თვის განმავლობაში იღებდნენ ჩვეულებრივ (არაფრის შემცველ) აბებს ან კონტრაცეპტულ აბებს.

ორალური კონტრაცეპტივები შეიცავდნენ ეთინილესტრადიოლსა და ლევონორგესტრელს. ეს აბები, თავისი შემცველობით, შვედეთსა და სხვა ქვეყნებში არსებული ჰორმონალური აბების შემადგენლობასთან ყველაზე ახლოს იყო. ექსპერიმენტის ხელმძღვანელებმა და მონაწილეებმა არ იცოდნენ, რომელი ქალი რომელ აბს იღებდა.

იმ ქალების ცხოვრების ხარისხი, რომლებიც ორალურ კონტრაცეპტივებს იღებდნენ, მეტად დაეცა, ვიდრე იმ ქალების, რომლებიც ჩვეულებრივ აბებს იღებდნენ, თუმცა "კონტრაცეპტივების" მიღებამ ორივე ჯგუფის გუნება-განწყობილებაზე, თვითკონტროლსა და ენერგიის ხარისხზე უარყოფითად იმოქმედა.

კვლევის მიხედვით, კონტრაცეპტივების მიღებისას დეპრესიის სიმპტომები არ გამოვლენილა.