საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის განცხადებით, სიძლიერე არ ნიშნავს, რომ მართალი ხარ, ხოლო უსამართლო ომები მარცხისთვისაა განწირული.

"საქართველოს მოსახლეობამ, სამწუხაროდ, ძალიან კარგად იცის რას ნიშნავს ომი. მან გამოსცადა უდანაშაულო მოქალაქეების ტანჯვა და იცის, თუ რატომ არის ასე მნიშვნელოვანი თავისუფლებისთვის ბრძოლა. მან ძალიან კარგად იცის, თუ რას განიცდის უკრაინელი ხალხი.

უკრაინაში მიმდინარე ომის გამო მსოფლიო ვეღარ იქნება ისეთი, როგორიც იყო. დღეს, ისე როგორც არასდროს, საზოგადოებებისა და კავშირების ერთად დგომის დროა, რომ ნდობაზე, სამართალსა და თავისუფლებაზე დამყარებული მომავალი ავაშენოთ. მოვიდა დრო, რომ მტკიცედ დავდგეთ და ხმა ავიმაღლოთ. სიძლიერე არ ნიშნავს, რომ მართალი ხარ. არც არასდროს ნიშნავდა და არც მომავალში იქნება ასე", — განაცხადა მან.

ბორელი აღნიშნავს, რომ რუსეთის პრეზიდენტის, ვლადიმერ პუტინის ქმედებები არა მარტო საერთაშორისო კანონმდებლობის უმძიმესი დარღვევა, არამედ ადამიანთა თანაცხოვრების ძირითად პრინციპების დარღვევაც არის. მისი თქმით, ევროკავშირი პუტინის არჩევანს "ჯუნგლების კანონის" დაბრუნებად მიიჩნევს. ბორელი ფიქრობს, რომ რუსეთის პრეზიდენტის სამიზნე არა მარტო უკრაინა, არამედ მთელი საერთაშორისო წესრიგია.

"მისმა აგრესიამ არაერთი უდანაშაულო სიცოცხლე შეიწირა და გაანადგურა ადამიანების სურვილი — იცხოვრონ მშვიდობიანად. ცეცხლი გაუხსნეს სამოქალაქო ობიექტებს, რაც ნათელი მაგალითია საერთაშორისო ჰუმანიტარული კანონმდებლობის დარღვევისა, რამაც აიძულა ადამიანები ქვეყნიდან გაქცეულიყვნენ. ჩვენ თვალწინაა ჰუმანიტარული კატასტროფა. თვეების განმავლობაში უპრეცედენტო ძალისხმევა გამოვიჩინეთ, რომ დიპლომატიური გზები გამოგვეძებნა. მაგრამ პუტინი ატყუებდა ყველას, ვინც მას ხვდებოდა, თითქოსდა საკითხის მშვიდობიანი მოგვარებით იყო დაინტერესებული. სანაცვლოდ, მან სრულმასშტაბიანი დაპყრობა და სრულფასოვანი ომის გაჩაღება აირჩია", — თქვა მან.

ბორელი ხაზს უსვამს, რომ დანაშაულის გასამართლებლად კრემლმა და მისმა მხარდაჭერებმა დეზინფორმაციის უზარმაზარი კამპანია წამოიწყეს. ის ამბობს, რომ დიდი ხანია, რაც ამ მხრივ, კრემლის საქმიანობის სამიზნე საქართველოცაა, თუმცა ქვეყანამ იცის როგორ უნდა აღმოაჩინოს ინფორმაციის მანიპულირების "კრემლისეული მცდელობა".

ბორელი აღნიშნავს, რომ მთელ მსოფლიოში კრემლის ქმედებების წინააღმდეგ ერთობლივი წინააღმდეგობისთვის პარტნიორებთან თანამშრომლობა გრძელდება.

"ქვეყნები გმობენ რუსეთის თავდასხმებს და გენერალურ ასამბლეაზე მთელმა საერთაშორისო საზოგადოებამ უნდა გააერთიანოს ძალები და ხელი შეუწყოს რუსეთის სამხედრო აგრესიის დასრულებას გაეროს შესაბამისი რეზოლუციის მიღების საშუალებით. განსაკუთრებულ მადლობას ვუხდით ალბანეთს, როგორც რეზოლუციის თანაშემდგენელს", — ამბობს ის.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში