მსოფლიოს ყველაზე ხანდაზმულმა ადამიანმა, ბრიტანელმა ეთელ კატერჰემმა, 117 წლის იუბილე ოჯახთან და მეგობრებთან ერთად აღნიშნა.

"მშვენიერი დღე მქონდა ოჯახისა და მეგობრების გარემოცვაში და მოუთმენლად ველოდები, რას მომიტანს შემდეგი წელი", — თქვა მან.

ეთელ კატერჰემი, რომელიც სურეიში, ლონდონიდან დაახლოებით 40 კილომეტრში ცხოვრობს, პირველი ბრიტანელია, რომელმაც 117 წლამდე იცოცხლა. ამის შესახებ გინესის მსოფლიო რეკორდების ორგანიზაცია წერს.

ეთელ კატერჰემი 1909 წლის 21 აგვისტოს დაიბადა. 117 წლის განმავლობაში ის ისეთ მნიშვნელოვან მოვლენებს მოესწრო, როგორიც ორი მსოფლიო ომი, ტიტანიკის ჩაძირვა, რუსეთის რევოლუცია და COVID-19-ის პანდემიაა. 2020 წელს, 110 წლის ასაკში, მან კორონავირუსიც კი გადაიტანა. გასულ წელს, 116 წლის იუბილეზე მას მეფე ჩარლზ III-ც შეხვდა.

მეფე ჩარლზ III გასულ წელს ეთელის 116-ე დაბადების დღეზე.

ფოტო: PA Wire

18 წლის ასაკში ეთელ კატერჰემი ინდოეთში მარტო გაემგზავრა, სადაც სამხედრო ოჯახის ძიძად მუშაობდა. მოგვიანებით ბრიტანეთის არმიის მაიორი ნორმან კატერჰემი გაიცნო და 1933 წელს დაქორწინდნენ. ეთელ კატერჰემი დღეს სამი შვილიშვილისა და ხუთი შვილთაშვილის ბებიაა.

მიუხედავად ასაკისა, ეთელ კატერჰემი ჯერ კიდევ არ ფლობს ადამიანის ისტორიაში ყველაზე ხანგრძლივი დადასტურებული სიცოცხლის რეკორდს. ეს რეკორდი ფრანგ ჟანა კალმანს ეკუთვნის, რომელმაც 1997 წელს 122 წლისა და 164 დღის ასაკში გარდაიცვალა.