ამერიკული მედიის ცნობით, აშშ-ის ცენტრალური სადაზვერვო სააგენტოს (CIA) დირექტორი ჯონ რატკლიფი სამშაბათს მოსკოვს ეწვია. გავრცელებული ინფორმაციით, ვიზიტის ფარგლებში ის შეხვედრებს გამართავს. ინფორმაციას Deutsche Welle ავრცელებს.

ვიზიტის შესახებ ინფორმაცია CBS News-მა და Axios-მა გავრცელეს, თუმცა მათ არ დაუზუსტებიათ, ვის ხვდება რატკლიფი ან რა თემებია დღის წესრიგში. CBS News საქმის კურსში მყოფ წყაროებზე დაყრდნობით წერს, რომ ეს რატკლიფის პირველი ცნობილი ვიზიტია რუსეთში CIA-ის ხელმძღვანელის რანგში. Axios კი ინფორმაციას ანონიმურ ამერიკელ ოფიციალურ პირზე დაყრდნობით ადასტურებს.

სამშაბათს დილით Flightradar24-ის მონაცემებმა აჩვენა, რომ აშშ-ის სამხედრო-სატრანსპორტო თვითმფრინავმა ლატვიიდან მოსკოვის ვნუკოვოს აეროპორტში გადაფრენა განახორციელა. ფრენების მონიტორინგის ვებგვერდის ცნობით, იმავე ხომალდმა მოსკოვი რამდენიმე საათში დატოვა.

Deutsche Welle წერს, რომ თუ გავრცელებული ცნობები დადასტურდა, ეს იქნება CIA-ის დირექტორის პირველი ვიზიტი რუსეთში უკრაინაში სრულმასშტაბიანი შეჭრის (2022 წელი) შემდეგ. მისმა წინამორბედმა, უილიამ ბერნსმა, რუსეთის პრეზიდენტ ვლადიმერ პუტინთან მოლაპარაკებები 2021 წელს გამართა.

Axios-ის ცნობით, რატკლიფმა ვაშინგტონი კვირას დატოვა და აშშ-ის მთავრობის კუთვნილი თვითმფრინავით ლატვიაში გაემგზავრა. სამშაბათს რატკლიფი ლატვიის დედაქალაქ რიგიდან მოსკოვში აშშ-ის საჰაერო ძალების C-17 ტიპის თვითმფრინავით გაემგზავრა.

რუსეთის პრეზიდენტის პრესსპიკერის, დიმიტრი პესკოვის, განცხადებით, ჯონ რეტკლიფის მოსკოვში ვიზიტი სპეცსამსახურებს შორის კონტაქტებს უკავშირდება.

"კითხვაზე, რა არის რეტკლიფის ვიზიტის მიზანი, პრესსპიკერმა დიმიტრი პესკოვმა The Post-ს განუცხადა, რომ ეს "უსაფრთხოების სამსახურებს შორის კონტაქტებს" უკავშირდება", — წერს Washington Post.