სანქტ-პეტერბურგის სტადიონმა, სადაც Ye-ს — რეპერ კანიე უესტის — ორი კონცერტი უნდა გამართულიყო, განაცხადა, რომ კონცერტებს მის ტერიტორიაზე არ უმასპინძლებს. თუმცა ღონისძიების პრომოუტერი ხაზს უსვამს, რომ კონცერტები არ გაუქმებულა. ამის შესახებ The Guardian წერს

სანქტ-პეტერბურგის სტადიონმა, "გაზპრომ არენამ" სოციალურ ქსელში გამოქვეყნებულ განცხადებაში აღნიშნა, რომ კონცერტის ორგანიზატორებთან იჯარის ხელშეკრულება არ გაფორმებულა, შესაბამისად, კონცერტი მათ არენაზე ვერ შედგება".

BBC წერს, რომ 2022 წელს უკრაინაში რუსეთის სრულმასშტაბიანი შეჭრის შემდეგ, ვესტი პირველი მსხვილი დასავლელი შემსრულებელი გახდებოდა, რომელიც რუსეთში კონცერტს გამართავდა. რეპერი წლებია ცდილობს თავისი რეპუტაციის აღდგენას ანტისემიტური განცხადებების შემდეგ, რისთვისაც მან ცოტა ხნის წინ ბოდიშიც მოიხადა.

"გაზპრომ არენამ" დაადასტურა, რომ ვესტის კონცერტთან დაკავშირებით უამრავი საჩივარი მიიღო და ხაზი გაუსვა, რომ მისი მოწვევის ორგანიზებაზე პასუხისმგებელი "არ ყოფილა და არც არის".

სტადიონის განცხადებით, 10 და 11 ოქტომბერს დაგეგმილი ღონისძიება, რომელზეც ბილეთები სრულად იყო გაყიდული, მოსკოვურმა სააგენტომ, Say Agency-მ დაორგანიზა.

Say Agency-მ საკუთარ Telegram-არხზე დაწერა, რომ სტადიონის გადაწყვეტილება მათთვის მოულოდნელი აღმოჩნდა.

"ამ [ინფორმაციის] შესახებ ჩვენც თქვენთან ერთად, მედიის საშუალებით გავეგეთ", — განაცხადა სააგენტომ. შემდგომ შეტყობინებაში კი დასძინა: "ამ დროისთვის კანიეს კონცერტი გაუქმებული არ არის. ჩვენ ვცდილობთ დავუკავშირდეთ "გაზპრომ არენას", რათა გავარკვიოთ პოსტის მიზეზი და მოვაგვაროთ პრობლემა. სიახლეებს ოპერატიულად გაცნობებთ".

გასულ კვირას "გაზპრომ არენა" სოციალურ ქსელში ენთუზიაზმით წერდა დაგეგმილ კონცერტებზე და კანიეს "ჩვენი დროის ყველაზე გავლენიან მუსიკოსს" უწოდებდა. გულშემატკივრებმა ბოლო განცხადებას იმედგაცრუებით უპასუხეს.

შეგახსენებთ, რომ ამერიკელმა მუსიკოსმა კანიე ვესტმა (Ye) თბილისში, დინამო არენაზე კონცერტი 2026 წლის 12 ივნისს გამართა.