ჟურნალისტის კითხვაზე, ვისი ბრალია, რომ საქართველო ევროკავშირის გაფართოების გეგმებიდან გაქრა, ოცნების დეპუტატი ლევან მახაშვილი ამბობს, რომ "მარტა კოსის გარდა, ვერავის ბრალს ვერ ხედავს".

შეგახსენებთ, რომ 25 აგვისტოს ევროკომისარმა გაფართოების საკითხებში მარტა კოსმა ელჩების კონფერენციაზე ვრცელი სიტყვა წარმოთქვა, რომელშიც ევროკავშირის გაფართოების პერსპექტივებზე ისაუბრა, თუმცა საქართველო უხსენებია.

"ვისი ბრალია? მარტა კოსის ბრალია. მარტა კოსის გარდა, მე აქ სხვა არავის ბრალს, თუ შეიძლება ასე ითქვას, ვერ ვხედავ. ერთადერთი ჩვენი, საქართველოს "წვლილი", "ბრალი" (ბრჭყალებში) ამ პროცესში არის ის, რომ საქართველომ არ გადაწყვიტა ომის ფერხულში ჩართვა. აი, ეს არის ერთადერთი, ბრჭყალებში, საქართველოს "ბრალი" და დღეს საქართველო, ასევე ბრჭყალებში, იხდის აი ამ მშვიდობის ფასს.

საქართველო გადაწყვეტილებებს იღებს იმის გათვალისწინებით, რა რეგიონში ვიმყოფებით, რა მეზობელი გვყავს, რა ტიპის მეზობელი გვყავს და ასე შემდეგ. ბრიუსელში თბილად, გემრიელად, არ ვიცი, ესპრესოს ყავაზე შეიძლება ლამაზია დანახვა ამ რეგიონის — ჩამოვიდნენ საქართველოში, წავიდეს, საოკუპაციო ხაზზე წავიდეს, ნახოს, რა ხდება საოკუპაციო ხაზზე, რა რისკების წინაშე დგას ქვეყანა", — განაცხადა ლევან მახაშვილმა.

მახაშვილი ამბობს, რომ "გაფართოების პოლიტიკა არ არის მხოლოდ გაფართოების პოლიტიკა, ის დამოკიდებულია გეოპოლიტიკურ ფაქტორებზე".

"მარტა კოსისთვის, მე მგონი, არც საქართველო არ არსებობს. ისე დაფრინავს აზერბაიჯანში თუ ყაზახეთში, რომ შეიძლება არც სჭირდებოდეს საქართველოზე გადაფრენაც. არაფერი ჩემთვის გასაკვირი არ არის ამ ადამიანისგან. ჩვენ ბევრი თარიღი გვინახავს. ხან 2022 წელი იყო გადამწყვეტი, ხან 2023 წელი იყო ისტორიული, ხან 25, 26 და ასე გაგრძელდება. და, როგორც ჩანს, საზოგადოება მივა იმ დონემდე, რომ იტყვიან, მერე 2045 წელი იქნება და არაფერი არ ხდება.

ამიტომ გავიზარდეთ, დავღვინდით და, მე მგონი, უკვე საზოგადოება გაიზარდა, დაღვინდა, დაბრძენდა... და ჩვენ სიტყვების ნაცვლად შევხედავთ, კონკრეტული რა ნაბიჯები იქნება გადადგმული ევროკავშირის მხრიდან. რომ გაფართოების პოლიტიკა არ არის მხოლოდ გაფართოების პოლიტიკა, ის დამოკიდებულია გეოპოლიტიკურ ფაქტორებზე... შევხედავთ და ვნახავთ", —– განაცხდა მახაშვილმა.