რუსთაველის გამზირზე მიმდინარე ინფრასტრუქტურული სამუშაოების გამო, თბილისის მერიამ ავტოსატრანსპორტო საშუალებების გადაადგილების დროებითი სქემა შეიმუშავა. ახალი რეგულაციები ძალაში 1-ელი სექტემბრიდან შევა. ქუჩების ნაწილზე მოძრაობა ორმხრივი ხდება, ნაწილზე — ცალმხრივი, კლასიკურ გიმნაზიასთან მისვლას კი ორი გზით იქნება შესაძლებელი.

რა იცვლება?

1-ელი სექტემბრიდან პავლე ინგოროყვას ქუჩაზე, "9 აპრილის" ქუჩის ნაწილზე (ინგოროყვასა და ჟვანიას ქუჩების კვეთებს შორის) და ჟვანიას ქუჩის მონაკვეთში ("9 აპრილიდან" ჭიჭინაძის ქუჩამდე) ორმხრივი მოძრაობა დაწესდება.

ბესიკის ქუჩის კვეთამდე გადაადგილება ცალმხრივი იქნება.

ბესიკის ქუჩის მონაკვეთი (ჟვანიასა და შევჩენკოს კვეთებს შორის) ცალმხრივი გახდება.

ცალმხრივი მოძრაობა იმოქმედებს შევჩენკოს ქუჩაზეც (ბესიკიდან ჭიჭინაძის მიმართულებით).

ლერმონტოვის ქუჩაზე შენარჩუნდება ცალმხრივი რეჟიმი, თუმცა შეიცვლება მიმართულება — ქიქოძისა და მაჩაბლის ქუჩებიდან ლერმონტოვის გავლით შალვა დადიანის ქუჩაზე მოხვედრა გახდება შესაძლებელი.

მძღოლები გიმნაზიასთან მისვლას ორი გზით შეძლებენ:

1. თავისუფლების მოედნიდან ლეონიძისა და ინგოროყვას ქუჩების გავლით "9 აპრილის" ქუჩაზე, საიდანაც მარცხნივ მოხვევით გადავლენ ჟვანიას ქუჩაზე და გააგრძელებენ გზას ბესიკისა და შევჩენკოს ქუჩებისკენ.

2. ალტერნატივაა ჭონქაძისა ან პოლიკარპე კაკაბაძის ქუჩებიდან მთაწმინდის ქუჩაზე გადასვლა და არსენას ქუჩის გავლით ბესიკისა და შევჩენკოს ქუჩებთან დაკავშირება.

შევჩენკოს ქუჩიდან მარცხნივ მოხვევით უკან დაბრუნება შესაძლებელი იქნება ჟვანიას, "9 აპრილისა" და ინგოროყვას ქუჩების საშუალებით. იქიდან მძღოლები ლეონიძისა და ქიქოძის ქუჩებით დაუკავშირდებიან ლერმონტოვისა და დადიანის ქუჩებს, ასევე თავისუფლების მოედანს.

მთაწმინდის ზედა ქუჩებზე მოხვედრა 9 აპრილის ქუჩიდან, არსენას ქუჩის გავლით გახდება შესაძლებელი.

დედაქალაქის მერის თქმით, დროებითი სქემის შესახებ დეტალური ინფორმაცია ვიდეორგოლის სახით გავრცელდება როგორც სოციალურ ქსელებში, ისე ტელევიზიით.

"რამდენიმე დღის წინ ვისაუბრე რამდენად მნიშვნელოვანია ჩვენი ქალაქისთვის აღნიშნული პროექტის განხორციელება, ასევე, ვისაუბრე რუსთაველის გამზირის მნიშვნელობაზე — მის წარსულზე, აწმყოზე და მომავალზე, თუ რამდენად მძიმე მდგომარეობაა და რა პრობლემებია მიწისქვეშა ინფრასტრუქტურის თვალსაზრისით. რა თქმა უნდა, პირველი, რაც კეთდება, არის მიწისქვეშა კომუნიკაციების შეცვლა, რასაც ახლავს ძალიან დიდი დისკომფორტი, განსაკუთრებით გადაადგილების თვალსაზრისით, ასევე, ხმაური და მტვერი, რაც იქ მცხოვრებ მოსახლეობას აწუხებს, თუმცა ამ მასშტაბის სამუშაოების წარმოება სხვანაირად აბსოლუტურად შეუძლებელია. შესაბამისად, ჩემი თხოვნა იყო, რომ ყველამ ერთად უნდა მოვითმინოთ ნოემბრის ბოლომდე და მერწმუნეთ, როდესაც რეაბილიტაცია დასრულდება, ეს იქნება საუკეთესო პროექტი და ყველა ვიამაყებთ შესრულებული სამუშაოებით", — განაცხადა კალაძემ.