ინტერნეტში გამოქვეყნებული ახალი ტექსტების მესამედზე მეტი შესაძლოა ხელოვნური ინტელექტის დახმარებით იყოს შექმნილი. ამის შესახებ კვლევას Pew Research Center აქვეყნებს. კვლევის თანახმად, ახალი ვებგვერდების დაახლოებით 35%-ში ხელოვნური ინტელექტის მიერ ტექსტის შექმნის ან მნიშვნელოვნად დამუშავების ნიშნები გამოვლინდა.

მკვლევრებმა ბოლო ხუთი წლის განმავლობაში გამოქვეყნებული თითქმის ნახევარი მილიონი ინგლისურენოვანი ვებგვერდი შეისწავლეს. ტექსტები სპეციალური ინსტრუმენტის, Open Pangram-ის საშუალებით გააანალიზეს, რომელიც აფასებს, რამდენად სავარაუდოა, რომ კონკრეტული ტექსტი ხელოვნური ინტელექტის გამოყენებით იყოს შექმნილი.

ფოტო: D & P Communications

მთლიან ნიმუშში AI-ის გამოყენების მნიშვნელოვანი ნიშნები ტექსტების დაახლოებით 10%-ში დაფიქსირდა. თუმცა, როდესაც მკვლევრებმა მხოლოდ ChatGPT-ის გამოჩენის შემდეგ გამოქვეყნებული ვებგვერდები შეისწავლეს, ეს მაჩვენებელი 35%-მდე გაიზარდა.

კვლევის შედეგები ე.წ. "მკვდარი ინტერნეტის თეორიის" გარშემო არსებულ დისკუსიასაც უკავშირდება. თეორია ვარაუდობს, რომ ინტერნეტში შექმნილი და მოხმარებული კონტენტის სულ უფრო დიდ ნაწილს ადამიანები კი არა, ავტომატიზებული სისტემები ქმნიან და ავრცელებენ.

კვლევამ ხელოვნური ინტელექტის წერისთვის დამახასიათებელი რამდენიმე ცვლილებაც გამოავლინა. მაგალითად, ბოლო წლებში ტექსტებში მნიშვნელოვნად გახშირდა გრძელი ტირეების, ოქსფორდის მძიმისა და ისეთი სიტყვების გამოყენება, რომლებსაც ჩატბოტები ხშირად იყენებენ, მაგალითად "delve" (ჩაღრმავება, დეტალურად შესწავლა) და "interplay" (ურთიერთქმედება, ურთიერთკავშირი).

ფოტო: Dan’s Media & AI Sandwich

საინტერესოა, რომ AI-ის გამოყენება ინტერნეტში თანაბრად არ არის გავრცელებული. კვლევის მიხედვით, .com დომენზე განთავსებულ ვებგვერდებზე ხელოვნური ინტელექტის მიერ შექმნილი ტექსტის ნიშნები დაახლოებით ორჯერ უფრო ხშირად ფიქსირდება, ვიდრე .org დომენებზე და ათჯერ უფრო ხშირად, ვიდრე .edu და .gov ვებგვერდებზე.

მკვლევრები აღნიშნავენ, რომ AI-ის ამომცნობი პროგრამები ყოველთვის ზუსტი არ არის და ზოგჯერ ხელოვნური ინტელექტის მიერ შექმნილ ტექსტს ადამიანის ნამუშევრად მიიჩნევს ან პირიქით. თუმცა, მათი თქმით, თითქმის ნახევარი მილიონი ტექსტის შესწავლამ ინტერნეტში არსებული საერთო ტენდენცია მაინც გამოავლინა.

ასევე იხილეთ: