დიდ ბრიტანეთში ახალი რეგულაცია ამოქმედდა, რომლითაც გელ-ლაქის (შილაკის) წარმოებაში ერთ-ერთი საკვანძო ქიმიური ნივთიერების, TPO-ს (ტრიმეთილბენზოილ დიფენილფოსფინ ოქსიდი) გამოყენება აიკრძალა. ინფორმაციას ბრიტანული მედია ავრცელებს.

TPO ფოტოინიციატორია, რომელიც ულტრაიისფერი (UV) ნათურის ქვეშ ლაქის გამყარებას, გამძლეობასა და ფერის ხანგრძლივ შენარჩუნებას უზრუნველყოფს. აკრძალვის მიზეზი ცხოველებზე ჩატარებული კვლევები გახდა, სადაც აღნიშნული ქიმიკატი რეპროდუქციულ პრობლემებსა და ფერტილობის (ნაყოფიერების) დაზიანებას დაუკავშირდა.

მწარმოებლებს TPO-ს შემცველი ახალი პროდუქციის გაყიდვა უკვე აეკრძალათ, თუმცა სალონებისთვის შეზღუდვა ეტაპობრივად ამოქმედდება — არსებული მარაგების გამოყენების საბოლოო ვადად 2027 წლის 14 თებერვალი განისაზღვრა.

ევროკავშირში აღნიშნული ნივთიერება 2025 წლის სექტემბრიდან უკვე აკრძალულია, ხოლო აშშ-ში, ავსტრალიასა და აზიაში მისი გამოყენება კვლავ ნებადართულია. დარგის სპეციალისტების განმარტებით, აკრძალვა გელ-მანიკიურის გაქრობას არ ნიშნავს, ვინაიდან ბაზარზე უკვე ფართოდ არის ხელმისაწვდომი TPO-სგან თავისუფალი უსაფრთხო ალტერნატივები.