150-ზე მეტმა რუსმა დეპუტატმა უკრაინაში რუსეთის შეჭრა გააპროტესტა და განცხადება გაავრცელა. ნოვაია გაზეტას ინფორმაციით, სიაში არიან საკრებულოს დეპუტატები რუსეთის სხვადასხვა ქალაქებიდან: მოსკოვი, სანკტ-პეტერბურგი, დიდი ნოვგოროდი, სამარა და სხვა.

"ჩვენ — ხალხის არჩეული დეპუტატები — უპირობოდ ვგმობთ რუსული არმიის თავდასხმას უკრაინაზე. ეს არის წარმოუდგენელი სისასტიკე, რომლის გამართლება არსებობს და არ შეიძლება არსებობდეს", — წერია მიმართვაში.

დეპუტატებს მიაჩნიათ, რომ უკრაინასთან ომი კატასტროფულ შედეგებს გამოიწვევს: ათასობით ადამიანი დაიღუპება და დაშავდება, რუსეთი იზოლირებული იქნება და ფასები გაიზრდება. მიმართვის დასასრულს დეპუტატები მოუწოდებენ რუსეთის მოსახლეობას, არ მიიღონ მონაწილეობა აგრესიაში, არ მოიწონონ იგი და არ გაჩუმდნენ.

ომის დაწყების შემდეგ უკრაინის პრეზიდენტმა, ვოლოდიმირ ზელენკიმ გაავრცელა ვიდეომიმართვა, რომელშიც თქვა, რომ ბევრი რამ არის დამოკიდებული რუს ხალხზე და რუსეთის მოქალაქეები თვითონ გადაწყვეტენ, რომელ გზას აირჩევენ პირადად.

"ყველა, ვისაც რუსეთში სინდისი ჯერ კიდევ არ დაუკარგავს, დროა, გამოვიდეს და გააპროტესტოს ომი უკრაინასთან", — თქვა ზელენსკიმ.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აყვნენ პანიკას.

სიტუაცია მუდმივად იცვლება. ამ ეტაპზე არსებული ინფორმაციით, დანაკარგები არის ორივე მხარეს. მაგალითად, უკრაინული შეიარაღებული ძალების გენერალური შტაბის ინფორმაციით, ქალაქ ხარკოვის შემოვლით გზაზე 4 ტანკი დაიწვა, განადგურდა 6 თვითმფრინავი, 2 ვერტმფრენი და დაიღუპა 50-მდე რუსი სამხედრო. უკრაინის პრეზიდენტის ადმინისტრაციაში აცხადებენ, რომ რომ 24 თებერვლის ღამეს 40-ზე მეტი უკრაინელი სამხედრო პირი დაიღუპა. გარდა ამისა, რუსებმა ხარკოვის ოლქში საცხოვრებელი კორპუსი დაბომბეს, დაიღუპა ერთი არასრულწლოვანი.

უკრაინის თავდაცვის მინისტრმა, ალექსეი რეზნიკოვმა მოუწოდა მოქალაქეებს, ვინც მზადაა და იცის იარაღის გამოყენება, ახლავე შეუერთდეს შეიარაღებულ ძალებს. ზელენსკიმ კი განაცხადა, რომ მისცემენ იარაღს ყველას, ვისაც ქვეყნის დაცვა სურს.

უკრაინამ რუსეთთან დიპლომატიური ურთიერთობა გაწყვიტა. პარტნიორი ქვეყნების უმეტესობამ დაგმო რუსეთის აგრესიული ქმედებები. დაგეგმილია G7-ის, ნატოს და გაეროს საგანგებო სხდომები.

გაიგეთ მეტი: