ყირიმში უკანონოდ მოგზაურობის ბრალდების შემდეგ ევროვიზია 2022-ს უკრაინის წარმომადგენელი გამოეთიშა
![](http://rachel.on.ge/2022/02/16/1645018865_620d0fef48b2c.jpg)
ფოტო: UA:PBC
2022 წლის ევროვიზიის სიმღერის კონკურსში მონაწილეობაზე უკრაინის წარმომადგენელმა, ალინა პაშმა, უარი თქვა. გადაწყვეტილება შიდაშესარჩევ კონკურსში მისი გამარჯვების შემდეგ განვითარებულ მოვლენებს მოჰყვა.
28 წლის მომღერალმა 12 თებერვალს უკრაინის საზოგადოებრივი მაუწყებლის ორგანიზებული პროექტის მოგების შედეგად წლევანდელ ევროვიზიაზე ქვეყნის წარდგენის უფლება მოიპოვა. ალინას ტურინში დაგეგმილ ნახევარფინალზე სიმღერა Тіні забутих предків ("დავიწყებული წინაპრების აჩრდილნი") უნდა შეესრულებინა.
თუმცა, პაშის გამარჯვებიდან მალევე გახმაურდა, რომ მომღერალი 2015 წელს ოკუპირებულ ყირიმს ეწვია. რადგან უკრაინის კანონმდებლობა ყირიმში ჩასვლის წესებს მკაცრად განსაზღვრავს — იკრძალება მოგზაურობა რუსეთის გავლით — საქმეზე გამოძიება დაიწყო, პაშს კი სასაზღვრო სამსახურის გაცემული საბუთების წარდგენა მოსთხოვეს. ამავდროულად, შედეგების მიღებამდე მაუწყებელმა კონტრაქტი შეაჩერა.
15 თებერვალს უკრაინის საზოგადოებრივი მაუწყებლის გენერალურმა დირექტორმა, მიკოლა ჩერნოტიცკიმ, გააზიარა სტატია, სადაც აღნიშნული იყო, რომ ქვეყნის სასაზღვრო სამსახურს პაშისთვის შესაბამისი საბუთი არ გაუცია. მართალია, გამოძიება გრძელდებოდა, მაგრამ ჩერნოტიცკიმ დასძინა, რომ "მისი აზრით, ევროვიზიაზე უკრაინა თაღლითებმა არ უნდა წარადგინონ".
სანამ მაუწყებელში გამოძიების საბოლოო შედეგს ელოდებოდნენ, ალინამ განაცხადა, რომ თავისი გუნდის ერთ-ერთმა წევრმა "დახმარება გადაწყვიტა" და საჭირო დოკუმენტაციის დროულად მოსაძიებლად "პოტენციურად ყალბი საბუთი" შექმნა. პაშის თქმით, მისთვის ეს სრულიად მიუღებელი იყო, რის გამოც აღნიშნულ პირთან თანამშრომლობას წყვეტდა.
თუმცა, საჭირო დოკუმენტაციის პოვნა სასაზღვრო სამსახურსაც გაუჭირდებოდა, რადგან, როგორც უკრაინული გამოცემა წერს, პაშის მოგზაურობის შესახებ ინფორმაცია მონაცემთა ბაზაში არ იძებნება. მიზეზი ისაა, რომ საზღვრის კვეთის შესახებ ინფორმაცია ბაზაში 5 წლის განმავლობაში ინახება, ალინა კი ყირიმში 2015 წელს ჩავიდა.
ყველა ცნობის გათვალისწინებით, ალინა პაშის ევროვიზიაზე მონაწილეობის შესახებ საბოლოო გადაწყვეტილება მაუწყებელს 18 თებერვალს უნდა მიეღო. თუმცა, მომღერალმა 16 თებერვალს ინსტაგრამპოსტით განაცხადა, რომ თავისი სურვილით ეთიშებოდა კონკურსს.
"მე უკრაინის მოქალაქე ვარ და ქვეყნის კანონმდებლობას ვემორჩილები", — წერს პაში, — "ვცდილობ, უკრაინის ტრადიციები და ღირებულებები მსოფლიოს გავაცნო. მე ხელოვანი ვარ და არა პოლიტიკოსი. PR-ის, მენეჯერებისა და ადვოკატების არმია არ მყავს, რომ ამდენ თავდასხმას, მუქარებსა და ზეწოლას გავუმკლავდე. ამ ვირტუალურ ომსა და სიძულვილში ყოფნა აღარ მინდა. მთავარი ომი ახლა გარეთაა, რომელიც ჩემს ქვეყანაში 2014 წლიდან მიმდინარეობს. აღარ მინდა, ამ ბინძურ ისტორიაში ვიყო გათხვრილი. გულდამძიმებული ვხსნი ევროვიზიაზე უკრაინის წარმომადგენლის სტატუსზე ჩემს კანდიდატურას. სამწუხაროდ. ძალიან ვწუხვარ".
ამ დროისთვის, უცნობია, როგორ მოიქცევა უკრაინის საზოგადოებრივი მაუწყებელი — შეარჩევს ახალ კონკურსანტს ევროვიზიისთვის თუ გამოეთიშება მასშტაბურ საერთაშორისო ღონისძიებას.
![](http://monica.on.ge/2022/02/16/1645022595.jpg)
ფოტო: UA:PBC
აღსანიშნავია, რომ უკრაინაში ევროვიზიის გარშემო მოვლენები ასე პირველად არ განვითარებულა. 2019 წელს უკრაინელი მომღერალი მარუვი, რომელსაც ქვეყანა ევროვიზიაზე უნდა წარედგინა, მაუწყებელმა რუსეთში დაგეგმილი ტურნეს გამო მოხსნა, მოგვიანებით კი, როცა უკრაინის წარდგენაზე ყველა პოტენციურმა კანდიდატმა უარი თქვა, კონკურსსაც გამოეთიშა.
2022 წლის ევროვიზიის სიმღერის კონკურსს იტალიის ქალაქი ტურინი უმასპინძლებს 10, 12 და 14 მაისს. რიგით 66-ე ევროფესტივალზე საქართველოს ჯგუფი ცირკუს მირკუსი წარადგენს.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
კომენტარები