ჰოლივუდის ლეგენდამ, ბრიუს უილისმა, რომელიც აფაზიასა და ფრონტოტემპორალურ ტვინის დემენციას ებრძვის, შაბათ-კვირა ოჯახთან ერთად გაატარა.

ბრიუსის 31 წლის ქალიშვილმა ტალულამ 22 ივნისს ინსტაგრამზე გამოაქვეყნა ფოტოები, რომლებშიც ჩანს, როგორ ატარებს დროს Die Hard-ის ვარსკვლავი ოჯახის წევრებთან, მათ შორის ტალულას საქმროსთან — ჯასტინ ეისისთან ერთად.

ერთ-ერთ სურათზე გამოსახულია ტალულა, რომელიც 70 წლის მსახიობს ეხუტება. მეორე ფოტოში კი მომცინარი ზის მამასთან ერთად და მისი ხელი უჭირავს.

ფოტო: buuski

ფოტო: buuski

ბოლო ფოტოსურათში კი ბედნიერი ბრიუსი და ეისი პოზირებენ, ხოლო მათ უკან თაროები ჩანს, რომლებზეც წლების განმავლობაში გადაღებული საოჯახო ფოტოებია განთავსებული.

ფოტო: buuski

ტალულამ, რომელიც ბრიუსისა და მისი ყოფილი მეუღლის — დემი მურის უმცროსი შვილია, ფოტოები შემდეგნაირად დაასათაურა: "მხიარული კვირა დღე ბებიასთან! მადლიერი ვარ".

უცნობია, რომელ ბებიაზე საუბრობს ტალულა პოსტში, რადგან მისი ორივე ბებია გარდაცვლილია, შესაბამისად, შესაძლოა ისინი ეისის ოჯახს ან რომელიმე სხვა ახლობელს ესტუმრნენ.

ბრიუსი და დემი 1987 წელს დაქორწინდნენ და 2000 წელს დაშორდნენ. ტალულას გარდა მათ კიდევ 2 საერთო შვილი ჰყავთ — სკაუტი, 33 წლის და რუმერი, 36 წლის. ბრიუსს შვილები მეუღლესთან, ემა ჰემინგ უილისთან ერთადაც ჰყავს — 13 წლის მეიბელი და 11 წლის ეველინი. ბრიუსი და ემა 2009 წელს დაქორწინდნენ.

2022 წლის მარტში უილისების ოჯახმა გაავრცელა ინფორმაცია ბრიუსის აფაზიის დიაგნოზის შესახებ. ეს დაავადება მოქმედებს ადამიანის კომუნიკაციის უნარზე, რის გამოც ვარსკვლავს მსახიობობისთვის თავის დანებება მოუწია.

მისი უკანასკნელი ფილმი ასასინი 2023 წელს გამოვიდა. იმავე წელს ოჯახმა განაცხადა, რომ ბრიუსს ფრონტოტემპერალური დემენციის დიაგნოზიც დაუსვეს.

Mayo Clinic-ის განმარტებით, ეს დაავადება განუკურნებელია და პროგრესულად აზიანებს ტვინის იმ ნაწილებს, რომლებიც პასუხისმგებელნი არიან პიროვნულ თვისებებზე, ქცევაზე, ენასა და მოძრაობაზე.

მას შემდეგ ბრიუსი იშვიათად ჩანს საჯარო სივრცეებში, ამის ნაცვლად, ის დროს სახლში, ოჯახთან ერთად ატარებს. როგორც ამბობენ, დიაგნოზთან ბრძოლაში მსახიობს ყოფილი მეუღლე დემიც მუდამ გვერდში უდგას. იმის მიუხედავად, რომ ბრიუსი და მური უკვე 25 წელია დაშორებულნი არიან, მათ წლების განმავლობაში ახლო ურთიერთობა შეინარჩუნეს და ხშირად ატარებენ დროს ოჯახებთან ერთად.

ფოტო: demimoore