სომხეთის პრემიერმინისტრმა, ნიკოლ ფაშინიანმა ეკლესიის მეთაურს, გარეგინ II-ს, საკუთარი პენისს ჩვენება მას შემდეგ შესთავაზა, რაც ერთ-ერთმა მღვდელმა ის წინადაცვეთაში დაადანაშაულა.

მამა ზარეჰ აშურიანმა ფაშინიანი წინადაცვეთაში ფეისბუქზე გამოქვეყნებულ პოსტში დაადანაშაულა და იუდასაც შეადარა, რითაც ხაზი გაუსვა იმას, რომ ფაშინიანი ქრისტიანი არ არის.

"ვფიქრობ, რომ ჩვენმა წმინდა სამოციქულო ეკლესიამ დაუყოვნებლივ უნდა განიწმინდოს იმ ცრუ "მორწმუნეებისგან", რომლებიც ერის მოღალატეები არიან, შეურაცხყვეს წინაპართა მეხსიერება, დაარღვიეს ნათლობის აღთქმა და წმინდა ჯვრის ბეჭედი წინადაცვეთის ნიშნით შეცვალეს," — დაწერა აშურიანმა.

მან ასევე მოუწოდა ფაშინიანს, დაესახელებინა სულიერი მოძღვრის სახელი, თუ ეს იუდა არ იყო, და დაამატა, რომ სომხეთის პრემიერმინისტრს სურს "გადაუსწროს თავის სულიერ წინაპარს, იუდას". აშურიანმა ფაშინიანს "იჯევანის იუდა" — მისი დაბადების ადგილის გამო უწოდა.

სამშაბათს, სოციალურ ქსელში გამოქვეყნებულ პოსტში, ფაშინიანმა კვლავ მიმართა გარეგინ II-ს მისი ერისკაცობის სახელით და განაცხადა, რომ მზად არის მიიღოს ქტრიჟ ნერსისიანი და მისი წარმომადგენელი (მამა აშურიანი) და წინადაცვეთასთან დაკავშირებით საპირისპირო დაამტკიცოს.

ფაშინიანმა შეკითხვა გარეგინ II-ს კიდევ ერთხელ დაუსვა — "და მიეცით საშუალება საბოლოოდ უპასუხოს შეკითხვას: დაურღვევია თუ არა უქორწინობის აღთქმა? ჰყავს თუ არა შვილი?"

ამ დროისთვის, ეს არის სომხეთის მთავრობისა და ეკლესიის შორის ბოლო კვირებში მიმდინარე დაპირისპირების ბოლო ეტაპი.

ფაშინიანსა და ეკლესიას შორის დაძაბულობამ პიკს მას შემდეგ მიაღწია, რაც ფაშინიანმა მაისის ბოლოს განაცხადა, რომ ეკლესიები "საწყობებად" იქცა და რომ სასულიერო პირები თავიანთ უბიწოების აღთქმას არღვევენ. ასევე, ფაშინიანმა გარეგინ II შვილის ყოლაში დაადანაშაულა.

ფაშინიანის თქმით, მან ეს საკითხი იმიტომ წამოჭრა, რომ როგორც სომხეთის სამოციქულო ეკლესიის მორწმუნემ დაინახა "სულიერი უსაფრთხოებისთვის შექმნილი საფრთხე", ხოლო როგორც პრემიერმინისტრმა – "ეროვნული უსაფრთხოებისთვის შექმნილი საფრთხე".

ფაშინიანის ბრალდებების შემდეგ, მთავრობასთან დაკავშირებულმა მედიასაშუალებებმა გარეგინ II-ის სავარაუდო შვილის ფოტო და სახელი გაავრცელეს.

საეკლესიო გადატრიალება?

სამშაბათს, ხელისუფლებასთან დაახლოებულმა მედიაპლატფორმამ Civic.am-მა, რომელიც დაკავშირებულია მმართველ პარტია სამოქალაქო ხელშეკრულებასთან, გამოაქვეყნა შვიდგვერდიანი დოკუმენტი, რომელიც, მათი მტკიცებით, წარმოადგენს "ოპოზიციის გადატრიალების გეგმას".

გამოქვეყნებული მასალის მიხედვით, გადატრიალებისათვის განსახილველ "ადამიანურ რესურსებად" მითითებულია: ეკლესია, ახლახან დაკავებული სომხური წარმოშობის რუსი მეწარმე სამველ კარაპეტიანი, ოლიგარქი გაგიკ წარუკიანი, ყოფილი პრეზიდენტები რობერტ ქოჩარიანი და სერჟ სარგსიანი, აგრეთვე მთიანი-ყარაბაღელი სომხები და სხვები.

სამველ კარაპეტიანს, რომელიც ეკლესიისთვის მხარდაჭერის გამოცხადების გამო, სომხეთის მთავრობასთან დაძაბული ურთიერთობის ფონზე, ძალაუფლების უზურპაციისკენ მოწოდებაში დაადანაშაულეს, ივნისის დასაწყისში წინასწარი პატიმრობა შეუფარდეს.

სამშაბათს კარაპეტიანი არმავირის ციხიდან სომხეთის ეროვნული უსაფრთხოების სამსახურის იზოლატორში გადაიყვანეს.

Civic.am-ის მიერ გამოქვეყნებულ დოკუმენტში ასევე საუბარია ფაშინიანისა და მისი მჭიდრო მოკავშირეების ეკლესიიდან განკვეთის გეგმებზე.

დოკუმენტის თანახმად, პროცესების კულმინაცია 21 სექტემბერს, სომხეთის დამოუკიდებლობის დღეს უნდა მომხდარიყო.

OC Media დამოუკიდებლად ვერ ადასტურებს დოკუმენტის ავთენტიკურობას.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება.

საქართველოში OC Media-ის პარტნიორი On.ge-ა. სტატია ინგლისურად შეგიძლიათ წაიკითხოთ აქ.