სანქტ-პეტერბურგის მოსკოვის რაიონულმა სასამართლომ განაჩენი გამოუტანა კრიმინალური დაჯგუფების სავარაუდო წევრებს, რომელთაც მედია "აზერბაიჯანულ მაფიას" უწოდებს. მსჯავრდებულებს შორის არიან არასრულწლოვნები აზერბაიჯანიდან და დაღესტნიდან.

დახურულ სასამართლო პროცესზე დაჯგუფების 16 წევრის განაჩენი გამოცხადდა. უმეტესობას ბრალი ეროვნული სიძულვილის გაღვივებასა და ძალადობრივ ხულიგნობაში წაუყენეს.

პროკურატურის ცნობით, 2023 წლიდან, დაჯგუფების წევრები თავს ესხმოდნენ სანქტ-პეტერბურგში გამვლელებს, ძირითადად ეთნიკურ რუსებსა და უზბეკებს.

"ბრალდებულები უმიზეზოდ ესხმოდნენ თავს 14-დან 21 წლამდე ასაკის ახალგაზრდებს, იყენებდნენ ძალადობას მათ მიმართ და აქვეყნებდნენ ვიდეოებს, რომლებსაც თან ახლდა წარწერები, რომლებიც გამოხატავდა ერთი ეროვნების უპირატესობას", — ნათქვამია სასამართლოს პრესრელიზში.

სამი წევრი დაღესტნელი იყო: ფარუხ იბრაგიმოვი, რამაზან ხალაევი და ემილ ხალაევი. სასამართლომ დაადგინა, რომ მათ უზბეკი და რუსული ეროვნების გამვლელებზე თავდასხმის ფაქტები გადაიღეს და კადრები Telegram-ის არხზე გამოაქვეყნეს სახელწოდებით — "მაწანწალას ცხოვრება".

ორშაბათის სასამართლოს გადაწყვეტილებით, იბრაგიმოვს და ორივე ხალაევს ოთხი წლით თავისუფლების აღკვეთა მიესაჯათ. არასრულწლოვანის სტატუსით, იბრაგიმოვი სასჯელს არასრულწლოვანთა გამოსასწორებელ დაწესებულებაში მოიხდის, ხოლო ხალაევები — ზოგადი რეჟიმის სასჯელაღსრულების კოლონიაში.

სხვა მსჯავრდებულებს შორის იყო ჯგუფის სავარაუდო ლიდერი, თურალ მამედოვი, ასევე რამდენიმე სხვა მონაწილე, წარმოშობით აზერბაიჯანელი. გამომძიებლების თქმით, მამედოვმა ორგანიზება გაუწია ძალადობრივ თავდასხმებს და საჯაროდ და კერძო Telegram-არხებით "ერთი ეროვნების უპირატესობას" უწევდა პოპულარიზაციას. ვიდეოების სოციალურ მედიაში გამოქვეყნების შემდეგ, მამედოვი რუსეთიდან გაიქცა, მაგრამ მოგვიანებით დააკავეს და აზერბაიჯანიდან მისი ექსტრადაცია განხორციელდა.

განაჩენების საპასუხოდ, დაცვის მხარის ადვოკატებმა სასჯელებს ზედმეტად მკაცრი უწოდეს და პირობა დადეს, რომ გადაწყვეტილებებს გაასაჩივრებდნენ.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება.

საქართველოში OC Media-ის პარტნიორი On.ge-ა. სტატია ინგლისურად შეგიძლიათ წაიკითხოთ აქ.