ზაფხულში თუ რომანტიკული კომედიების ყურებას ფსიქოლოგიური თრილერის ან ჰორორის ნახვას ამჯობინებ, ეს ახალი სერიალი შენს ყურადღებას უთუოდ მიიქცევს. Amazon Prime Video-ზე სულ ახლახან შედგა პრემიერა სერიალისა, რომლის უკანაც, არც მეტი, არც ნაკლები, ვამპირის დღიურების შემქმნელი ჯული პლეკი დგას. We Were Liars ("ჩვენ მატყუარები ვიყავით") ამავე სახელწოდების ბესტსელერ რომანს ეფუძნება.

სერიალში ამბავი ერთი ოჯახის გარშემო ვითარდება. სინკლერებს, ერთი შეხედვით, ყველაფერი აქვთ, ოჯახური იდილიაც და სიმდიდრეც, რომლის წყალობითაც ზაფხულებს კერძო კუნძულზე ატარებენ. თუმცა, ყველა ზაფხული ერთიმეორეს როდი ჰგავს; ქეიდენს სინკლერ ისტმენი კუნძულზე თავის ნათესავებთან, ჯონისთან და მირენთან, და ბიჭთან, სახელად გეტთან, ერთად "მატყუარების" წრეს აყალიბებს. ერთ-ერთ ზაფხულს მომხდარი საშინელება ქეიდენსს თავის მძიმე ტრავმის გამო არ ამახსოვრდება, მაგრამ ორი წლის შემდეგ კუნძულზე ჩასულ მოზარდს მოგონებები ნელ-ნელა უბრუნდება და საზარელი ზაფხულის საიდუმლოდ შემორჩენილ ამბავსაც იხსენებს...

ჩვენ მატყუარები ვიყავით ამერიკელი მწერლის, ე. ლოკჰარტის, 2014 წელს გამოქვეყნებული მოზარდული (YA) რომანია, რომელიც 35-ზე მეტ ენაზეა ნათარგმნი და მთელ მსოფლიოში სამ მილიონამდე ეგზემპლარადაა გაყიდული. ჯული პლეკი კი, რომლის გახმაურებულ სერიალებს შორისაა ასევე ვამპირის დღიურების სპინ-ოფი პირველყოფილები და ვამპირების აკადემია, ლოკჰარტის წიგნით დიდი ხნის განმავლობაში ყოფილა დაინტერესებული.

"ამ წიგნს წლების განმავლობაში დავდევდი", — აღნიშნავს სცენარისტი, რეჟისორი და პროდიუსერი, — "ერთ-ერთი საუკეთესო YA რომანია, რომელიც წამიკითხავს და მერე კიდევ არაერთხელ გადავიკითხე. იდუმალი, რომანტიკული და სულისშემძვრელი ამბავია".

აღსანიშნავია, რომ წიგნს მოჰყვა წინაისტორია, "პრიკველი" — მატყუარების ოჯახი. შემოდგომაზე გამოიცემა რომანის გაგრძელებაც. თუმცა, ჯერჯერობით უცნობია, მოჰყვება თუ არა მეორე სეზონი სერიის ეკრანიზაციას.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…