ჰოლივუდის ისტორიაში მრავლად მოიძებნება ფილმები, რომლებიც შავკანიანების ჩაგვრისა და მონობის შესახებ გვიყვება. ბევრ მათგანში მთავარ როლებს სწორედ აფროამერიკელები თამაშობენ, თუმცა არსებობს ისეთი კინოსურათებიც, სადაც მათ როლს თეთრკანიანები ასრულებენ.

How to get away with murder-ის მსახიობმა, ვაიოლა დევისმა ემის დაჯილდოებაზე წარმოთქმულ სიტყვაში ფერადკანიანი ქალების წინაშე არსებულ გამოწვევებზე ისაუბრა: "ერთადერთი რამ, რაც ფერადკანიან ქალებს სხვა დანარჩენებისგან გამოყოფს, შესაძლებლობაა. შენ ვერ მოიგებ ემის იმ როლისათვის, რომელიც უბრალოდ არ არსებობს", - ამბობდა ვაიოლა.

თუმცა, როგორც აღმოჩნდა, არის შემთხვევები, როდესაც არსებობს როლები, მაგრამ ამ როლებს შავკანიანების ნაცვლად თეთრკანიანები ასრულებენ.

ანჯელინა ჯოლი

ანჯელინა ჯოლიმ 2007 წელს ფრანგი ჟურნალისტი მარიან პერლის როლი შეასრულა. რომელიც ამერიკელი ჟურნალისტის დანიელ პერლის ქვრივია, რომელიც 2002 წელს პაკისტანში გაიტაცეს და მოკლეს.

ბენ აფლეკი

ფოტო: Los Angeles Time

ბენ აფლეკიმა 2012 წლის ოსკაროსან მხატვრულ ფილმში ტონი მენდესის როლი შეასრულა, რომელიც ცენტრალური სადაზვერვო სამმართველოს ოპერატიული მუშაკი იყო.

ჯულიეტ ბინოში

2015 წელს, ფილმში, 33, ჯულიეტ ბინოშმა მარია სეგოვიას როლი შეასრულა. ფილმის სიუჟეტი ჩილეში, მაღაროში მომხდარ ტრაგედიას ეხება. საინტერესოა, რატომ მაინცდამაინც ფრანგი ჯულიეტ ბინოში?

კეტრინ ჰეპბერნი

ფილმში Dragon Seed, რომელიც ჩინეთ-იაპონიის მეორე ომის შესახებ მოგვითხრობს, კეტრინი ჩინელი ქალის როლს ასრულებს, რომელიც საკუთარ სოფელს იაპონელებისგან იცავს.

რა თქმა უნდა, ეს სრული ჩამონათვალი არ არის, როდესაც თეთრკანიანი მსახიობი ფერადკანიანის როლს ასრულებს. რა თქმა უნდა, რეჟისორს და პროდიუსერს აქვს უფლება ის აიყვანოს როლზე ვინც სურს, მაგრამ საინტერესოა რა ხდება ამ გადაწყვეტილების მიზეზი? მით უმეტეს მაშინ, როცა უკვე დიდი ხანია ამ გადაწყვეტილებების გამო პრესაში აქტიურად დამკვიდრდა ტერმინი Whitewashing in film, რომელიც თეთრკანიანის მიერ ფერადკანიანის თამაშს აღნიშნავს.

როგორც პროდიუსერები ამბობენ, ხშირად ამ გადაწყვეტილების მიზეზი ფინანსური მიზეზები ხდება, მიუხედავად იმისა, რომ შესაბამის როლზე ბევრი სხვა კანდიდატის მოძებნა შეიძლება, თანაც უფრო ნაკლები ანაზღაურებით, კინოკომპანიებს ურჩევნიათ როლი ცნობილ მსახიობს მისცენ იმის იმედად, რომ მისი სახელის გაჟღერებით ფილმი ფინანსურად მომგებიანი აღმოჩნდება.