ჯეფ გრინმა, რომელიც იუტის შტატის უმდიდრეს ადამიანად მიიჩნევა, უკანასკნელი დღის წმინდანთა იესო ქრისტეს ეკლესია, იგივე მორმონები, დატოვა. გრინმა ეკლესიის უხუცესს წერილი მისწერა და შეატყობინა, რომ "მისი აზრით, ინსტიტუტი ხელს უშლის მსოფლიოში ქალების, ლგბტქ და სამოქალაქო უფლებების, ასევე რასობრივი თანასწორობის განვითარებას".

გრინმა, რომელიც ტექნოლოგიურ კომპანიას ხელმძღვანელობს, ეკლესია არაფორმალურად რამდენიმე წლის წინ დატოვა, თუმცა, ცოტა ხნის წინ, უხუცესისთვის გაგზავნილ წერილში, მან უკვე ოფიციალურად მოითხოვა თავისი ანგარიშების წაშლა.

ბიზნესმენი დასძენს, რომ ეკლესიის წევრების უმეტესობა "კარგი ადამიანია და სიკეთის გაკეთებას ცდილობს", თუმცა, მისი აზრით, "ეკლესია ამჟამად მსოფლიოს აქტიურად აყენებს ზიანს".

"ეკლესიის ხელმძღვანელობა თავისი ისტორიის, ფინანსებისა და შეხედულებების შესახებ გულწრფელად არ საუბრობს", — წერს გრინი.

ამასთან ერთად, მან გადაწყვიტა, რომ ლგბტქ უფლებების მხარდამჭერი ჯგუფის, Equality Utah-ისთვის $600 ათასი გადაერიცხა. როგორც გრინი აცხადებს, გაღებული თანხის თითქმის ნახევარი იუტაში მცხოვრები ლგბტქ სტუდენტების სწავლის დაფინანსებას მოხმარდება — მათაც, "ვისაც შესაძლოა უნდოდეს ან უწევდეს" თავისი ყოფილი სასწავლებლის, ბრიგემ იანგის უნივერსიტეტის დატოვება, რომელსაც მორმონთა ეკლესია აფინანსებს.

ლგბტქ ჯგუფი, რომელმაც გრინის დახმარება მიიღო, ბიზნესმენისადმი მადლიერებას გამოხატავს და დასძენს, რომ მათთვის თანამოაზრეების პოვნა ყოველთვის სასიხარულოა, მით უმეტეს, იუტის შტატში.

იუტაში ადგილობრივების 62 პროცენტი და შტატის კანონმდებლების 86 პროცენტი მორმონთა ეკლესიის წევრია, რომელიც ღიად ეწინააღმდეგება ერთი და იმავე სქესის წყვილების ქორწინებას და ცოტა ხნის წინ ინიცირებულ თანასწორობის დადგენილებას — კანონპროექტს, რომელიც ლგბტქ ადამიანებს სხვადასხვა სიტუაციაში დისკრიმინაციისგან დაიცავს.

ამის მიუხედავად, ადგილობრივმა აქტივისტების ჯგუფებმა მაინც მოახერხეს კანონმდებლებთან და რელიგიურ ლიდერებთან ერთად მნიშვნელოვან ინიციატივებზე მუშაობა. 2015 წელს აქ მიიღეს კანონი, რომელიც დასაქმების პროცესში სექსუალური ორიენტაციის ან გენდერული იდენტობის ნიშნით დისკრიმინაციას კრძალავს. თუმცა, რელიგიური ინსტიტუტები აღნიშნავდნენ, რომ ამგვარი აკრძალვა მათ რწმენას ეწინააღმდეგებოდა. ამასთან, 2017 წელს, შტატის გუბერნატორმა გააუქმა კანონი, რომელიც საჯარო სკოლებში ჰომოსექსუალობაზე საუბარს კრძალავდა. გასულ წელს აქ აიკრძალა ეგრეთ წოდებული გარდაქმნის თერაპიაც.

სხვათა შორის, რამდენიმე წლის წინ, ეკლესიის წევრი, რომელიც გარდაქმნის თერაპიის საქმიანობაში იყო ჩართულა, გეიდ დაქამინგაუთდა.

ამის მიუხედავად, შტატში ქვიარ ადამიანებისთვის მაინც ბევრი გამოწვევა არსებობს. მიმდინარე წელს, ბრიგემ იანგის უნივერსიტეტი ლგბტქ სტუდენტებისთვის ერთ-ერთ ყველაზე ცუდ სასწავლებლად დასახელდა. უნივერსიტეტი ერთი და იმავე სქესის წყვილების ურთიერთობას კრძალავს და არ ცნობს ლგბტქ სტუდენტების გაერთიანებას.

რაც შეეხება გრინს, გარდა Equality Utah-ისთვის გაღებული თანხისა, იგი თავისი $5-მილიარდიანი ქონების 90 პროცენტზე მეტის საქველმოქმედო საქმიანობაში დახარჯვას აპირებს.