სახალხო დამცველი საქართველოს პრეზიდენტს შეხვდა. ნინო ლომჯარიას თქმით, კონკრეტული დაპირება სალომე ზურაბიშვილისგან არ მოუსმენია, მაგრამ როგორც ამბობს, დაინახა, რომ პრეზიდენტი ყველაფრისთვის მზად არის.

"პრეზიდენტს არ სურს, რომ ეს პროცესი აღქმული იყოს, თუნდაც კონკრეტულ პოლიტიკურ პარტიებს შორის გარკვეულ შეთანხმებად, ან გარიგებად. ის ამ პროცესს უფრო ფართოდ უყურებს, თუმცა თუ საზოგადოებრივ დაკვეთას, ან ეროვნულ შეთანხმებას დასჭირდება, არ გამოვრიცხავ, რომ გადადგმული იქნება ეს ნაბიჯები. თუმცა ამაზე კონკრეტული დაპირება არ მომისმენია პრეზიდენტისგან, მაგრამ მე დავინახე, რომ ის ყველაფრისთვის მზად არის ნამდვილად", — განაცხადა ლომჯარიამ.

მისივე თქმით, მას არ სურს, ეს პროცესი, თუნდაც მესამე პრეზიდენტის შეწყალებამდე დავიწროვდეს, რადგან ეს უფრო სერიოზული პროცესია, რომელიც არამარტო ერთ ადამიანს, არამედ საზოგადოების ფართო ფენებსა და პოლიტიკურ პირებს შეეხება.

პრეზიდენტმა ეროვნული თანხმობის ინიციატივის პროცესში შეხვედრები დაიწყო. გუშინ, 21 დეკემბერს ის ოპოზიციის რამდენიმე წარმომადგენელს შეხვდა: სალომე სამადაშვილს, ხატია დეკანოიძეს, მამუკა ხაზარაძეს, ბადრი ჯაფარიძეს, ალეკო ელისაშვილს, ლევან იოსელიანს, ანა დოლიძეს, იაგო ხვიჩიას და ვახტანგ მეგრელიშვილს. ნიკა მელიამ აღნიშნა, რომ მომდევნო კვირაში პრეზიდენტს ისიც შეხვდება.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.