იუსტიციის უმაღლესი საბჭოს არამოსამართლე წევრის, ევა გოცირიძის მოსაზრებით, გამოხატვის თავისუფლება იმ დოზით, რაც ამჟამად საქართველოში არსებობს, მისთვის მიუღებელია. მან ამის შესახებ ტელეკომპანია პირველის პირდაპირ ეთერში, დღეს ისაუბრა.

ევა გოცირიძემ თავისი მოსაზრების გასამყარებლად გამოიყენა რუსთავი 2-ის მიერ ტელეკომპანიის საქმის განმხილველ მოსამართლეებზე მომზადებული სიუჟეტები. მან ჟურნალისტური ეთიკის ქარტიას მსგავსი ქმედებებზე რეაგირების კუთხით ეფექტიანობაც დაუწუნა:

"აქ არის საუბარი იმაზე, არის თუ არა ეს სწორი და უნდა მისცეს თუ არა საზოგადოებამ და პირველ რიგში, ჟურნალისტთა კორპუსმა შეფასება. ამიტომ, ყველა ჟურნალისტს მოვუწოდებ, საკითხი, სად გადის ჟურნალისტის გამოხატვის თავისუფლების ზღვარი კრიტიკისა და ლანძღვის კონტექსტში, კარგად იყოს გაცნობიერებული და ასევე გაითვალისწინოთ, არის თუ არა ქარტია, რომელსაც არ შეურთდა ჟურნალისტთა უმეტესობა, ეფექტიანი ამ ტიპის დარღვევებზე რეაგირებისათვის. მით უმეტეს, რომ უზარმაზარი რაოდენობა ჟურნალისტებისა არ შეუერთდა ამ ქარტიას, რაც მე მაძლევს საშუალებას ვივარაუდო, რომ მათ საერთოდ არ აიღეს თავზე არანაირი პასუხისმგებლობა და მათთვის გამოხატვის თავისუფლება არის ნებისმიერი რამის თქმის უფლება, ეს აბსოლუტურად მიუღებელია ჩემთვის."

ევა გოცირიძის მოსაზრებით, გამოხატვის თავისუფლება უნდა იყოს ისეთი, რომ "შეურაცხყოფა არ მიაყენონ კონკრეტული ადამიანების რეპუტაციას, არ შელახონ სასამართლოს პრესტიჟი და ავტორიტეტი."

დიანა ტრაპაიძემ ევა გოცირიძეს ჰკითხა, რა უნდა გააკეთოს საზოგადოებამ მაშინ, თუ არსებობს სერიოზული ეჭვები მოსამართლის ქმედებებთან დაკავშირებით. მან გაიხსენა გირგვლიანის მოსამართლის, ჩემიას ქმედებებიც, რაზეც გოცირიძემ უპასუხა:

"ყველაფერი არის შეფარდებითი, კრიტიკა დასაშვებია, მწვავე კრიტიკაც დასაშვებია, განსაკუთრებით მაშინ, თუკი არსებობს საკმარისი ობიექტური საფუძველი, მაგრამ ისეთი გამონათქვამები, რომელიც სცილდება ყოველგვარ ზღვარს, წარმოადგენს მოსამართლეებისადმი მტრული დამოკიდებულების გაღვივებას, მოსამართლეებისადმი სიძულვილის თესვას, რომელსაც იყენებენ, თავის მხრივ, მოსამართლეებისა და იმ გადაწყვეტილებების დისკრედიტაციისთვის, რომელსაც ეს სასამართლო იღებს."

ევა გოცირიძის თქმით, ამჟამად ცილისწამებისთვის ჩივილის პროცედურები საკმარისად ეფექტიანი არ არის. მან კიდევ ერთხელ გაიხსენა რუსთავი 2-ის მიერ საკუთარი საქმის გაშუქება:

"რუსთავი 2-ის ხელში იყო ბერკეტი, რომლითაც მას შეეძლო საზოგადოებაში შეექმნა ისეთი შთაბეჭდილება, რომელიც მათთვის იყო ხელსაყრელი.

ეს იყო დამაზარალებელი სასამართლოს რეპუტაციისთვის და ეს იყო ხელისშემშლელი მართლმსაჯულებისათვის".

იუსტიციის უმაღლესი საბჭო, რომლის არამოსამართლე წევრიც ევა გოცირიძეა, წარმოადგენს დამოუკიდებელ ორგანოს, რომლის მოვალეობებში შედის მოსამართლეთა საკვალიფიკაციო გამოცდების ორგანიზება, პირველი და მეორე ინსტანციის მოსამართლეთა დანიშვნა, სასამართლოების შექმნა, ან გაუქმება, მოსამართლეთა მიმართ დისციპლინური საქმისწარმოების წამოწყება და ა.შ.

რაც შეეხება საქართველოს ჟურნალისტური ეთიკის ქარტიას, ის არის ჟურნალისტთა დამოუკიდებელი გაერთიანება, რომლის მისიაა, პროფესიული და ეთიკური სტანდარტის დაცვისა და თვითრეგულირების მექანიზმების შექმნის გზით, მედიის საზოგადოებრივი პასუხისმგებლობის ამაღლება. ორგანიზაცია 2009 წლის 4 დეკემბერს დაფუძნდა და მას ამჟამად 318 ხელმომწერი ჰყავს. ნებისმიერი პირი, რომელიც მიიჩნევს, რომ რომელიმე ჟურნალისტმა დაარღვია ეთიკის სტანდარტი, უნდა მიმართოს ქარტიას განცხადებით, რის შემდეგაც ქარტიის საბჭო, მხარეების მონაწილეობით განიხილავს საქმეს და ადგენს, ჟურნალისტმა დაარღვია თუ არა ქარტიის რომელიმე პრინციპი. ქარტია არ არის ჟურნალისტთა სადამსჯელო ორგანიზაცია, ის სანქციას არ აკისრებს არავის. ქარტია განიხილავს როგორც ხელმომწერი, ისე არახელმომწერი ჟურნალისტების წინააღმდეგ შესულ განცხადებებს.