1997 წლის 15 ოქტომბერს, კაცობრიობის ისტორიაში ერთ-ერთი ყველაზე მნიშვნელოვანი კოსმოსური მისია გაეშვა. Titan IV ტიპის რაკეტამ კოსმოსში Cassini–Huygens ხომალდ გაიყვანა. მისიამ, რომელშიც ორი კოსმოსური ხომალდი შედიოდა, ჩვენი მზის სისტემის ერთ-ერთი ყველაზე საინტერესო და ლამაზი პლანეტისკენ აიღო გეზი.

ფოტო: NASA

კასინი ორბიტერი ხომალდია, რომლის მისიაც სატურნის ორბიტაზე გასვლა და სხვადასხვა მონაცემების შეგროვებაა, ხოლო ჰიუგენსი თანამგზავრ ტიტანზე უნდა დამჯდარიყო.

2004 წლის პირველ ივლისს, შვიდწლიანი მოგზაურობის შემდეგ, Cassini–Huygens სატურნის ორბიტაზე გავიდა. იმავე წლის 25 დეკემბერს ჰიუგენსი კასინის გამოეყო და თავისი მისიის შესასრულებლად თანამგზავრ ტიტანისკენ გაფრინდა. 2014 წლის 14 იანვარს ჰიუგენსი ტიტანზე დაჯდა.

ეს ტიტანის ზედაპირის ფოტოა, რომელიც ჰიუგენსმა დაჯდომის შემდეგ გამოაგზავნა:

ფოტო: NASA

კასინი 20 წელიწადზე მეტია კოსმოსში იმყოფება და ამ ხნის განმავლობაში მეცნიერებს უამრავი მნიშვნელოვანი რამ აღმოაჩენინა. მაგალითად, ენცელადზე არსებული ოკეანე და იქ მიმდინარე ჰიდროთერმული პროცესები. ტიტანზე არსებული მეთანის ზღვები, წვიმები, ტბები და მდინარეები.

ეს მნიშვნელოვანი მოგზაურობა დასასრულს უახლოვდება, რადგან კასინის საწვავი უმთავრდება და იმისთვის, რომ პლანეტის ის მთვარეები, რომლებზეც სიცოცხლის არსებობის პირობები და შანსები არსებობს, დედამიწიდან ჩატანილი გარე ნაგვისა და ბაქტერიებისგან დავიცვათ, ნასამ გადაწყვიტა, ხომალდი სატურნის ატმოსფეროში შეუშვას და გაანადგუროს.

ფოტო: NASA

თუმცა ვიდრე კასინი სატურნის ატმოსფეროში დაიწვება, ის კიდევ ბევრ მნიშვნელოვან მონაცემს მოგვაწვდის.

დამასრულებელი მისიის შესრულებისას კასინის ანტენა დედამიწისკენ იქნება მომართული და ყველა მონაცემს ჩვენკენ გამოუშვებს. ის სატურნსა და მის რგოლს შორის ჩაიფრენს, გადაიღებს ფოტოებს, მოაგროვებს ქიმიურ და სხვა ტიპის ინფორმაციას.

22 აპრილს კასინი ტიტანს ჩაუფრენს და თვითგანადგურების მისიას დაიწყებს. ხომალდი სატურნსა და მის რგოლს შორის პირველად 26 აპრილს ჩაიფრენს, ამ მანევრის განხორციელებას ნასა 22-ჯერ შეეცდება, ხოლო 2017 წლის 15 სექტემბერს კასინი, 20 წლიანი ერთგული მუშაობის შემდეგ, სატურნის ატმოსფეროში შევა და ყველას დაგვემშვიდობება.