არაერთი წარმატების შემდეგ, ნანა ექვთიმიშვილისა და სიმონ გროსის ახალ ფილმს ჩემი ბედნიერი ოჯახი Cinevue-ს კინოკრიტიკოსი პატრიკ გემბლიც ეხმიანება და წერს, რომ ფილმი მშვიდი და დამანგრეველი დრამაა იმაზე, თუ რას ნიშნავს იყო ქალი იმ სამყაროში, რომელიც კაცებს ეკუთვნით.

"მიუხედავად იმისა, რომ ფილმი ტექნიკურად სრულყოფილია და ყველა მსახიობი სასიამოვნოდ თამაშობს, ჩემი ბედნიერი ოჯახი მაინც ია შუღლიაშვილის [მთავარი როლის შემსრულებელი] ფილმია. მთელი აქცენტი სწორედ მის პერსონაჟზეა და ის თითქმის არასდროს უჩინარდება ეკრანიდან. მისი თამაშის არაჩვეულებრივი მანერა საშუალებას იძლევა უთანაგრძნო, გაბრაზდე და გახდე ამ ისტორიის მონაწილე, რაც ნამდვილად დაუვიწყარია. ჩემი ბედნიერი ოჯახი არ არის მარტივი ზღაპარი ერთი ქალის ემანსიპაციის შესახებ, ეს არის უნივერსალური ზღაპარი მსოფლიოს ყველა ქალისთვის ეს არის მშვიდი და დამანგრეველი პორტრეტი, იმისა, თუ რას ნიშნავს იყოს ქალი იმ სამყაროში, რომელიც კაცებს ეკუთვნის", - წერს გემბლი.

შეგახსენებთ, რომ The New York Times-მა ნანა ექვთიმიშვილი და სიმონ გროსი იმ ცხრა ახალ რეჟისორს შორის დაასახელა, რომელთა ფილმებსაც აუცილებლად უნდა უყუროთ.

კინოკრიტიკის რუბრიკის მთავარი რედაქტორი, მანოლა დარგისი წერდა, რომ ჩემი ბედნიერი ოჯახი ქალის გათავისუფლების ისტორიაა.

"მთავარი გმირი, მანანა (მშვენიერი, მომხიბვლელი ია შუღლიაშვილი) ცოლი, დედა, შვილი და დიასახლისია. ამ სტანდარტული როლებიდან მას არც ერთი არ ანიჭებს ბედნიერებას. ეს არის სარკასტული და ემოციური ისტორია ქალის გათავისუფლების შესახებ. მოვლენების ცენტრში არის ქალი, რომელიც კარს იჯახუნებს და ამით მთელ ოჯახს შოკირებულს ტოვებს. მას უნდა, რომ უკან მოიტოვოს კლაუსტროფობიული სივრცე და მასში მცხოვრები პრეტენზიული ადამიანები. ოჯახი ცდილობს, მანანა შეზღუდოს, ის კი თავისუფლებისთვის იბრძვის. ნანა ექვთიმიშვილსა და სიმონ გროსს შეეძლოთ გენიალური ქორეოგრაფები გამხდარიყვნენ, მაგრამ გაგვიმართლა, რომ მათ რეჟისორობა გადაწყვიტეს", - ასე ახასიათებს კინოფილმს მანოლა დარგისი.

ნანა ექვთიმიშვილისა და სიმონ გროსის ფილმის გლობალური დისტრიბუციის უფლება ცოტა ხნის წინ ნეტფლიქსმა იყიდა, ხოლო სანდენსის კინოფესტივალზე ის წლის აღმოჩენად დაასახელეს.

რეჟისორებს ნანა ექვთიმიშვილსა და სიმონ გროსს კი ცოტა ხნის წინ, სოფიას საერთაშორისო კინოფესტივალზე საუკეთესო რეჟისურისათვის პრიზი გადაეცათ.

ფილმის შესახებ დაწერეს ისეთმა გავლენიანმა გამოცემებმა, როგორებიცაა: გერმანული შპიგელი, Villagevoice, Theplaylist, The Hollywood Reporter და Newdirectors.

ჩემი ბედნიერი ოჯახის პრემიერა უკვე შედგა ამერიკის შეერთებულ შტატებსა და ბერლინში, წლის ბოლომდე კი მას ქართველი მაყურებელიც იხილავს.