ნანა ექვთიმიშვილის ფილმს, რომლის გლობალური დისტრიბუციის უფლებაც ნეტფლიქსმა იყიდა, საერთაშორისო გამოცემები აქტიურად განიხილავენ. ჩემი ბედნიერი ოჯახი სანდენსის კინოფესტივალის წლევანდელ აღმოჩენადაც დასახელდა.

პირველი რეცენზია Villagevoice-მა გამოაქვეყნა, სადაც ჟურნალისტი წერდა, რომ წლის ერთ-ერთი საუკეთესო ფილმი ნახა.

"ჩემი ბედნიერი ოჯახი არ არის ისტორია მხოლოდ იმაზე, თუ როგორ თავისუფლდება ქალი წნეხისგან. ნანამ და სიმონმა შესაშურად მოახერხეს გადმოეცათ მანანას [მთავარი პერსონაჟის] ცხოვრების დეტალები ოჯახში. ეს არის არაჩვეულებრივი ფილმი, რომელიც მოგვითხრობს, თუ რას ნიშნავს და რა შეიძლება მოხდეს, როდესაც ოჯახში სიყვარულიც და კამათი თანაბრად არის. გულისტკივილისგან ახალი შესაძლებლობები იბადება. ეს არ არის მხოლოდ ფილმი, ეს არის ცხოვრება თავისი საშინელებებითა და დიდებით", - წერს გამოცემა.

შემდეგი Theplaylist იყო, კინომიმომხილველი ენდრიუ კრამპი ამბობდა, რომ ჩემი ბედნიერი ოჯახი კომპლექსური, საინტერესო და ბოლო წლების ერთ-ერთი ყველაზე ინტელექტუალური ფილმი აღმოჩნდა.

საკუთარი რეცენზია გამოაქვეყნა The Hollywood Reporter-მაც.

"ჩემი ბედნიერი ოჯახი ნათელი მაგალითია იმისა, თუ როგორ ებრძვიან ქალებს ყველგან - ქუჩაში, სამსახურში და ოჯახშიც კი. ეს უკანასკნელი კი ყველაზე მეტად გაიძულებს გაქცევას, მაგრამ ყველაზე სახიფათო ბრძოლა მაშინ იწყება, როცა აცნობიერებ, რომ შესაძლოა გასაქცევი არსად გქონდეს. ნანასა და სიმონის ფილმში არის რამდენიმე სცენა, რომელიც ვუდი ალენის ფილმებს მოგაგონებთ, განსაკუთრებით - ენი ჰოლს", - წერდა ჯორდან მინტზერი.

ახლახან კი ფილმის საკუთარი შეფასება გამოაქვეყნა გერმანულმა Spiegel-მაც, სადაც ჟურნალისტი აღნიშნავს, რომ ჩემი ბედნიერი ოჯახი თავისუფალ სივრცეს გვაჩვენებს.

"ჩემი ბედნიერი ოჯახი გვაჩვენებს თავისუფალ სივრცეს, რომელსაც მანანა [ია შუღლიაშვილი] მოიპოვებს, მაგრამ იმ ფასსაც, რომლის გადახდაც მას ამისთვის უწევს", - წერია სტატიაში.

ფილმის სიუჟეტი თბილისური ოჯახის გარშემო ვითარდება, სადაც სამი თაობის წარმომადგენლები ერთ ჭერქვეშ ცხოვრობენ. ხშირად აღნიშნავენ, რომ ნანა ექვთიმიშვილის ფილმების ერთ-ერთი მთავარი შტრიხი მის მიერ შექმნილი ქალი პერსონაჟებია. მოვლენების ცენტრში ამ შემთხვევაშიც ქალი, ქართული ენისა და ლიტერატურის პედაგოგი მანანა მხეიძეა, რომელიც ერთ დღეს საკუთარი ცხოვრების შეცვლას მოინდომებს.

ჩემი ბედნიერი ოჯახის პრემიერა უკვე შედგა ამერიკის შეერთებულ შტატებში, დღეს კი მას ბერლინალეზე იხილავენ, წლის ბოლომდე შედგება ფილმის ქართული პრემეირაც.