ფილმ ჩემი ბედნიერი ოჯახის რეჟისორებს ნანა ექვთიმიშვილსა და სიმონ გროსს სოფიას საერთაშორისო კინოფესტივალზე საუკეთესო რეჟისურისათვის პრიზი გადაეცათ.

ნანა ექვთიმიშვილისა და სიმონ გროსის ფილმის გლობალური დისტრიბუციის უფლება ცოტა ხნის წინ ნეტფლიქსმა იყიდა, ხოლო სანდენსის კინოფესტივალზე ის წლის აღმოჩენად დაასახელეს.

ფილმის შესახებ წერდნენ ისეთი გავლენიანი გამოცემები როგორებიც არის: გერმანული შპიგელი, Villagevoice, Theplaylist, The Hollywood Reporter და Newdirectors.

"ჩემი ბედნიერი ოჯახი არ არის ისტორია მხოლოდ იმაზე, თუ როგორ თავისუფლდება ქალი წნეხისგან. ნანამ და სიმონმა შესაშურად მოახერხეს გადმოეცათ მანანას [მთავარი პერსონაჟის] ცხოვრების დეტალები. ეს არის არაჩვეულებრივი ფილმი, რომელიც მოგვითხრობს, თუ რას ნიშნავს და რა შეიძლება მოხდეს, როდესაც ოჯახში სიყვარულიც და კამათი თანაბრად არის. გულისტკივილისგან ახალი შესაძლებლობები იბადება. ეს არ არის მხოლოდ ფილმი, ეს არის ცხოვრება თავისი საშინელებებითა და დიდებით", - წერდა Villagevoice-ის ჟურნალისტი.

კინოკრიტიკოსი ჯორდან მინტზერი კი წერდა, რომ ჩემი ბედნიერი ოჯახი ნათელი მაგალითია იმისა, თუ როგორ ებრძვიან ქალებს ყველგან - ქუჩაში, სამსახურში და ოჯახშიც კი, მინტზერი ამბობდა, რომ ნანასა და სიმონის ფილმში არის რამდენიმე სცენა, რომელიც ვუდი ალენის ფილმებს მოგვაგონებს, განსაკუთრებით კი ენი ჰოლს.

გერმანული გამოცემა Der Freitag ფილმზე დაწერილ რეცენზიაში აღნიშნავს, რომ "ჩემი ბედნიერი ოჯახი" ქალის ძალიან საინტერესო პორტრეტს გვიჩვენებს.

"ჩემი ბედნიერი ოჯახი საზოგადოების შთამბეჭდავ სურათთან ერთად ქალის კიდევ ერთ, საინტერესო პორტრეტს გვიჩვენებს, რომელსაც შეეძლო მთავარი საკონკურსო პროგრამაც კი გაემდიდრებინა.", - წერს გამოცემა.

ფილმის სიუჟეტი თბილისური ოჯახის გარშემო ვითარდება, სადაც სამი თაობის წარმომადგენლები ერთ ჭერქვეშ ცხოვრობენ. ხშირად აღნიშნავენ, რომ ნანა ექვთიმიშვილის ფილმების ერთ-ერთი მთავარი შტრიხი მის მიერ შექმნილი ქალი პერსონაჟებია. მოვლენების ცენტრში ამ შემთხვევაშიც ქალი, ქართული ენისა და ლიტერატურის პედაგოგი მანანა მხეიძეა, რომელიც ერთ დღეს საკუთარი ცხოვრების შეცვლას მოინდომებს.

ჩემი ბედნიერი ოჯახის პრემიერა უკვე შედგა ამერიკის შეერთებულ შტატებსა და ბერლინში, წლის ბოლომდე კი მისი პრემიერა საქართველოშიც შედგება.