გორის სამხედრო ჰოსპიტალში ექსპრეზიდენტ მიხეილ სააკაშვილის გასინჯვის შემდეგ ექიმთა კონსილიუმის წევრი ნინო შარაშენიძე აცხადებს, რომ პაციენტის მდგომარეობა დინამიკაში ნამდვილად გაუმჯობესებულია. მათივე თქმით, აქვს გარკვეული ჩივილები, რაც აბსოლუტურად ადეკვატურია და მისი ჯანმრთელობის მდგომარეობა ამ ეტაპზე სრულიად კონტროლირებადია.

"მდგომარეობა დინამიკაში ნამდვილად გაუმჯობესებულია, სტაბილურია. უტარდება აბსოლუტურად ადეკვატური თერაპია ძალიან მომზადებული და კარგი გუნდის. ჩვენ ვნახეთ ლაბორატორიული კვლევის შედეგები, შევაფასეთ პაციენტის თერაპიული სტატუსი და დავსახეთ ლაბორატორიული კვლევების შემდეგი სქემა, შევიმუშავეთ მკურნალობის ტაქტიკა, მედიკამენტები", — განაცხადა შარაშენიძემ.

მისივე თქმით, ამ პროცესში ჩართული იყო არამხოლოდ მათი კონსილიუმის გუნდი, არამედ გორის სამხედრო ჰოსპიტლის ექიმები, პარალელურად კი რესპუბლიკური საავადმყოფოს ექიმიც.

"შესაბამისად, ჩვენ მივიღეთ გადაწყვეტილება ხვალინდელ დღესთან მიმართებაში როგორ უნდა მოვიქცეთ. ქალბატონმა ელენემ დასახა მკურნალობის კვებითი რეჟიმის ახალი ტაქტიკა, ბატონმა სანდრომ შეაფასა მისი ნევროლოგიური სტატუსი. აქვს გარკვეული ჩივილები, რაც აბსოლუტურად ადეკვატურია. ამ დროისათვის აქვს თავის ტკივილები და რაღაც გარკვეული პრობლემები, რომლებიც ნელ-ნელა მნიშვნელოვნად კორეგირდება. იღებს საკვებს სქემის მიხედვით", — აღნიშნავს ექიმი.

ექიმთა კონსილიუმის კიდევ ერთი წარმომადგენელი სანდრო ცისკარიძე ამბობს, რომ პაციენტის ნევროლოგიური სტატუსი გუშინდელთან შედარებით პოზიტიური დინამიკა აღინიშნება, თუმცა გარკვეული ცვლილებები რჩება.

"იმედი გვაქვს, ადეკვატური მკურნალობის ფონზე მდგომარეობა არ დამძიმდება. ჯერჯერობით, ვერ ვიტყვი, რომ შეგვიძლია მოდუნება და მშვიდად ყოფნა, ცხადია არა. ველოდებით, რომ მოხერხდება გართულებების თავიდან აცილება, თუმცა, ჯერჯერობით, სრულად ამისგან გარანტირებულები არ ვართ", — აღნიშნა ცისკარიძემ.


გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.