ამერიკის შეერთებული შტატების სახელმწიფო მდივანი, მარკო რუბიო საფრანგეთის პრეზიდენტის, ემანუელ მაკრონის მიერ პალესტინის სახელმწიფოს აღიარებას სოციალურ ქსელში გამოეხმაურა.

"ამერიკის შეერთებული შტატები მკაცრად უარყოფს ემანუელ მაკრონის გეგმას, რომელიც გაეროს გენერალურ ასამბლეაზე პალესტინური სახელმწიფოს აღიარებას ითვალისწინებს.

ეს უპასუხისმგებლო გადაწყვეტილება მხოლოდ ჰამასის პროპაგანდას ემსახურება და მშვიდობას აფერხებს. ეს 7 ოქტომბრის მსხვერპლთათვის სილის გაწვნაა", — დაწერა მარკო რუბიომ.

ცნობისთვის, 2023 წლის 7 ოქტომბერს ჰამასმა მოულოდნელი და მასშტაბური თავდასხმა განახორციელა ისრაელზე. თავდასხმის დროს 1,200-ზე მეტი ადამიანი, უმეტესად მშვიდობიანი მოქალაქეები დაიღუპნენ. თავდასხმა სარაკეტო დარტყმებს, შეიარაღებულ შეჭრას ისრაელის ქალაქებში და მუსიკალურ ფესტივალზე მოწყობილ ხოცვა-ჟლეტას მოიცავდა. ასობით ადამიანი ჰამასმა ტყვედ ჩაიგდო და ღაზაში გადაიყვანა. ეს იყო ისრაელისა და პალესტინელთა კონფლიქტის ერთ-ერთი ყველაზე სისხლიანი დღე, რომელმაც რეგიონი ახალ ომამდე მიიყვანა.