თვალჭრელიძის ქუჩაზე განვითარებულ მოვლენებთან დაკავშირებით კახა კალაძემ საკუთარ სოციალურ ქსელში ვიდეომიმართვა გაავრცელა. მისი თქმით, პროცესში მერია არ ჩაერთვება იმიტომ, რომ შენობა მუნიციპალიტეტის საკუთრება არარის.

მან ვიდეომიმართვაში ოქმების ფოტოსურათები აჩვენა და აღნიშნა, რომ დედაქალაქში რეგისტრირებულ ყველა პირს სამგორის გამგეობა ქირით უზრუნველყოფას სთავაზობდა, რაზეც კალაძის თქმით, მოსახლეობამ უარი განაცხადა.

"მინდა, კარგად ნახოთ, რა საფრთხის მქონე შენობებზეა საუბარი, გაჩვენებთ ფოტოებს. აი, აქედან მოსახლეობის იძულებით გაყვანა ყოფილა დანაშაული. გახსოვთ ის ბრალდებები, შეურაცხყოფა და თავდასხმა, რაც სულ ახლახან სადგურის მოედნის მიმდებარედ სახლის ჩამოშლას მოჰყვა. ზუსტად ის ხალხი, ვგულისხმობ ზოგიერთი მედიის წარმომადგენლებს, ოპოზიციას, ე.წ. ექსპერტებს, ვინც ერთი კვირის განმავლობაში გვლანძღავდა იმის გამო, რატომ არ გავიყვანეთ იძულების წესით იმ კორპუსის მცხოვრებლები ბინებიდან, დღეს უტიფრად აცხადებენ, რომ მეოთხე კატეგორიის მქონე შენობებიდან ხალხის იძულებით გაყვანა, არის დანაშაული. თანაც ეს მათი საკუთრება არ არის. ეს იგივეა თქვენს საცხოვრებელში შემოიჭრას ვინმე, მიმართოთ სახელმწიფოს და სახელმწიფომ არ იმოქმედოს", — თქვა კახა კალაძემ.

მოსახლეობის თქმით, მათ (თბილისში რეგისტრირებულ პირებს) მხოლოდ 3 თვის განმავლობაში 300 ლარით უზრუნველყოფა შესთავაზეს, რაც მათივე თქმით, საკმარისი არ იყო და არც გარანტია არსებობდა იმისა, რომ სამი თვის შემდეგ მუნიციპალიტეტი მათ კვლავ დაეხმარებოდა.