საფრანგეთის პრეზიდენტის, ემანუელ მაკრონის განცხადებით, საფრანგეთი პალესტინის სახელმწიფოს დამოუკიდებლობას აღიარებას აპირებს.

"იმ ისტორიული ვალდებულების ერთგულების თანახმად, რომელიც, ახლო აღმოსავლეთში სამართლიან და მდგრად მშვიდობას ახლავს, მე გადავწყვიტე, რომ საფრანგეთი პალესტინის სახელმწიფოს აღიარებს," — დაწერა ემანუელ მაკრონმა X-ზე.

როგორც მან აღნიშნა, ჰამასის დემილიტარიზაცია "ხელს შეუწყობს ახლო აღმოსავლეთში ყველას უსაფრთხოებას".

"ჩვენ ასევე უნდა უზრუნველვყოთ ჰამასის დემილიტარიზაცია, ღაზას უსაფრთხოება და აღდგენა.

და ბოლოს, ჩვენ უნდა ავაშენოთ პალესტინის სახელმწიფო და უზრუნველვყოთ მისი სიცოცხლისუნარიანობა. მისი დემილიტარიზაცია და ისრაელის სრული აღიარება ხელს შეუწყობს ახლო აღმოსავლეთში ყველას უსაფრთხოებას. სხვა ალტერნატივა არ არსებობს," — განაცხადა მან.

მაკრონის თქმით, პალესტინის დამოუკიდებელ სახელმწიფოდ აღიარება სექტემბერში მოხდება. როგორც მან აღნიშნა, საფრანგეთი G7-ის პირველი წევრი იქნება რომელიც ამას გააკეთებს.

საფრანგეთის პრეზიდენტმა X-ზე გამოქვეყნებულ პოსტში განაცხადა, რომ ოფიციალური განცხადება ნიუ-იორკში დაგეგმილ გაეროს გენერალური ასამბლეის სესიაზე გაკეთდება.

პალესტინის ოფიციალური პირები მაკრონის გადაწყვეტილებას მიესალმნენ, ხოლო ისრაელის პრემიერმინისტრმა ბენიამინ ნეთანიაჰუმ განაცხადა, რომ ეს ნაბიჯი წარმოადგენს "ტერორის დაჯილდოებას" ჰამასის მიერ ისრაელში 2023 წლის 7 ოქტომბერს განხორციელებული თავდასხმის შემდეგ.

გადაწყვეტილებას "უგუნური" უწოდა ამერიკის შეერთებული შტატების სახელმწიფო მდივანმა მარკო რუბიომ და განაცხადა, რომ აშშ "კატეგორიულად უარყოფს" მაკრონის განცხადებას.

ცნობისთვის, ამჟამად, პალესტინის სახელმწიფო გაეროს 193 წევრი სახელმწიფოდან 140-ზე მეტმა აღიარა. მათ შორის არიან ესპანეთი და ირლანდიაც, რომლებიც ევროკავშირის წევრები არიან. პალესტინის სახელმწიფო არ უღიარებიათ ამერიკის შეერთებულ შტატებს და დიდ ბრიტანეთს.