ვისოლ ჯგუფის პრეზიდენტის, სოსო ფხაკაძის განცხადებით, საწვავის მომხმარებელი ქვეყნების უმეტესობას არანაირი ბერკეტი არ გააჩნია, თავიდან აიცილოს საერთაშორისო ბაზრებზე ნავთობ პროდუქტებზე ფასების მატების ნეგატიური ზეგავლენა, მათ შორის, საქართველოსაც. ფხაკაძე აღნიშნავს, რომ მის მიერ გაკეთებული კომენტარი სოციალურ მედიაში არასწორი სათაურით გავრცელდა.

"საწვავზე მაღალი ფასი არის თემა, რომლის მიმართაც საზოგადოება ყოველთვის მგრძნობიარეა და ეს ხდება არა მარტო ჩვენს ქვეყანაში.

მე, როგორც ამ ქვეყნის რიგით მოქალაქეს და ადამიანს, რომელიც ოცი წელია აშენებს იმას, რასაც კონკრეტულად ვისოლი ჰქვია, ბუნებრივია, მაწუხებს თითოეული ადამიანის რეაქცია, საჯარო თუ არასაჯარო პროტესტი, რომელიც საწვავის მაღალ ფასს უკავშირდება.

თუმცა, სამწუხაროდ, ჩვენ, ისევე, როგორც საწვავის მომხმარებელი ქვეყნების უმეტესობას, არანაირი ბერკეტი არ გაგვაჩნია თავიდან ავიცილოთ საერთაშორისო ბაზრებზე ნავთობ პროდუქტებზე ფასების მატების ნეგატიური ზეგავლენა", — ნათქვამია განცხადებაში.

სოსო ფხაკაძის თქმით, კომპანია ყოველთვის ცდილობს, საერთაშორისო ბაზარზე საწვავის ფასის მკვეთრი მატება მთლიანად არ აისახოს მომხმარებლებზე და პროცესი, მინიმუმ, დროში გაიწელოს.

"თუმცა არსებობს ობიექტური ფაქტორები, რომელთა ზეგავლენასაც ჩვენ ვერანაირად ვერ გავექცევით. დღეს საწვავზე ფასების მნიშვნელოვან ზრდაზე საუბრობენ ძალიან ბევრ ქვეყანაში და ამის შესახებ ინფორმაციის მოპოვება წამებში არის შესაძლებელი", — წერია განცხადებაში.

აღსანიშნავია, რომ ფხაკაძემ საკუთარ პოსტში მხოლოდ საერთაშორისო ფასების გავლენაზე ისაუბრა და არაფერი უთქვამს მთავრობის როლზე. მისი თქმით, დანტერესების შემთხვევაში, მზად არის ფასებთან დაკავშირებით არსებულ ყველა კითხვას საჯარო განხილვებით გასცეს პასუხი.

4 ნოემბერს მედიაში გავრცელდა სოსო ფხაკაძის განცხადება, სადაც ნათქვამია, რომ საერთაშორისო ფასების ზრდის გამო საქართველოში საწვავის ღირებულება უფრო მაღალი უნდა იყოს.

ამ განცხადებას სოციალურ ქსელში კრიტიკა და პროტესტი მოჰყვა. "უარი საწვავის ფასებს" — ასე ჰქვია საპროტესტო ტალღას, რომელიც რამდენიმე დღის წინ დაიწყო. მოქალაქეთა ნაწილი ბენზინის გაძვირებას აპროტესტებს. ისინი ერთმანეთს მოუწოდებენ, არ ისარგებლონ ბრენდირებული ბენზინგასამართი სადგურებით. მათი აზრით, ეს აიძულებს კომპანიებს, საწვავი გაიაფდეს. ამასთანავე, პროტესტის მონაწილეები სოციალურ ქსელში თავადვე ავრცელებენ ფოტო-ვიდეო მასალებს და ამტკიცებენ, რომ ბენზინგასამართი სადგურების ნაწილი დაცარიელებულია.

ქვეყანაში საწვავზე ფასების ცვლილებაზე სამი ძირითადი ფაქტორი მოქმედებს: საერთაშორისო ფასები, აქციზის გადასახადი და ეროვნული ვალუტის გაცვლითი კურსი.

ნავთობიმპორტიორთა კავშირში აღნიშნავენ, რომ სახელმწიფოს აქვს თეორიული ბერკეტი — მცურავი აქციზის შემოღებით დაასტაბილუროს საწვავზე ფასები. მცურავი აქციზი ნავთობპროდუქტებზე ფასების დაწევა/აწევის შესაბამისად აქციზის გადასახადის ავტომატურ კორექტირებას გულისხმობს.

გაიგე მეტი:

• მოქალაქეთა ნაწილი ბრენდირებულ ბენზინგასამართ სადგურებს ბოიკოტს უცხადებს — რა ხდება