მასაჩუსეტსში 9 წლის გოგომ დედ-მამა ტრაგიკულად დაღუპვას გადაარჩინა: ჯეილინ ბარბოსა ბრანდაო სახლში სწორედ მაშინ მივიდა, როცა მისი მშობლები ნახშირბადის მონოოქსიდის ზედმეტი დოზის ჩასუნთქვით იწამლებოდნენ. CNN-ის მიხედვით, პატარა ჯეილინი არ დაბნეულია და მაშინვე მიხვდა, რომ მშობლებს სასწრაფო დახმარება ესაჭიროებოდათ.

ზედმეტი პანიკის გარეშე მან მამის ტელეფონი აიღო, რათა დახმარება გამოეძახებინა, მაგრამ მიხვდა, რომ მობილური სახის ამომცნობი სისტემის გამო დაბლოკილი იყო. არც ამან დააბნია 9 წლის ჯეილინ ბარბოსა ბრენდაო, ტელეფონი მამის სახესთან მიიტანა, განბლოკა და ასე შეძლო 911-ზე დარეკვა.

ჯეილინს არც მისი 7 წლის დაიკო დავიწყებია და სახლიდან უსაფრთხოდ გაიყვანა.

ფოტო: Scott Mcdonnell

ინციდენტის მიზეზად ჯეილინის დედამ 3-დღიანი უშუქობა დაასახელა. ამის გამო გენერატორი თავიდან სახლის უკანა კარის მახლობლად დაამონტაჟეს, შემდეგ კი სახლში შეიტანეს. ახლა მათ იციან, რომ არცერთი ადგილი არ არის უსაფრთხო გენერატორის დასაყენებლად.

სამომხმარებლო პროდუქტების უსაფრთხოების კომისიამ დაადგინა, რომ ბრენდაოების ოჯახში ნახშირბადის მონოოქსიდის კონცენტრაცია დასაშვებ ნორმაზე გაცილებით მაღალი იყო. საბედნიეროდ, ჯეილინის მშობლები ახლა თავს კარგად გრძნობენ, ხოლო ჯეილინს, მის პატარა დაიკოსა და ბებიას, რომლებიც სახლში იმყოფებოდნენ, მოწამვლის არცერთ სიმპტომი არ აღენიშნებათ.

"ის ძალიან ჭკვიანია. მას რომ დახმარებისთვის მაშინვე არ დაერეკა, არც კი ვიცი, რა მოხდებოდა", — ამბობს დედა ჯეილინის შესახებ.

მსგავსი შემთხვევების ასარიდებლად კი, უსაფრთხოების სააგენტო ნახშირბადის მონოოქსიდის დეტექტორის დაყენებას უწევს რეკომენდაციას.