რადას წევრმა, ალექსანდრ კოვალჩუკმა მიხეილ სააკაშვილთან შეხვედრამდე განცხადა, რომ უკრაინელ დეპუტატებს სურთ, ექსპრეზიდენტი, მიხეილ სააკაშვილი, როგორც უკრაინის მოქალაქე, ქვეყანაში დააბრუნონ. დეპუტატის თქმით, ეს პოზიცია აქვს უკრაინის ხელისუფლებას, ოპოზიციასა და პრეზიდენტს.

"ჩვენ ჩვენს მოქალაქეს მსოფლიოს არცერთ წერტილში არ ვტოვებთ და ყველაფერს გავაკეთებთ იმისთვის, რომ ისინი უკრაინაში დავაბრუნოთ. რა თქმა უნდა, მიხეილ სააკაშვილი გამონაკლისი არ არის, ის უკრაინის მოქალაქეა და გვინდა, რომ დავაბრუნოთ. ძალიან გვაწუხებს მისი ჯანმრთელობის მდგომარეობა და სიცოცხლე. ჩვენ ყველას კარგად გვესმის, რომ 30 დღე უკვე ძალიან დიდი დროა შიმშილობისთვის და შესაბამისი სამედიცინო მომსახურეობის აღმოჩენა აუცილებელია.

კოვალჩუკი აღნიშნავს, რომ 3 დღის მანძილზე აწარმოებდნენ მოლაპარაკებებს იმისთვის, რომ სააკაშვილის მონახულების საშუალება მისცემოდათ.

"მისი მონახულება რომ შეგვძლებოდა, მოლაპარაკებებს 3 დღის განმავლობაში ვაწარმოებდით ყველა დონეზე, როგორც საქართველოში, ასევე, უკრაინაში. გვინდა ვნახოთ, რამდენად კრიტიკულია მდგომარეობა. მთავარი კი ისაა, რომ მას გადავცეთ დიდი პოზიტიური ენერგია და ვუთხრათ, რომ ბევრი უკრაინელი ღელავს მის ჯანმრთელობაზე და ელოდება მის დაბრუნებას", — ამბობს ის.

ექსპრეზიდენტმა დღეს, 29 ოქტომბერს განაცხადა, რომ კონსილიუმთან თანამშრომლობასა და ანალიზების გაკეთებაზე უარს ამბობს, ასევე, აღარ მიიღებს შიმშილობის შემამსუბუქებენ მკურნალობაზე.

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 29 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

მისი პირადი ექიმის, ნიკოლოზ ყიფშიძის განცხადებით, სააკაშვილი გლდანის ციხეში მკურნალობის კატეგორიულად წინააღმდეგია. ექიმის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".